Macron setur Johnson afarkosti

Emmanuel Macron Frakklandsforseti hefur gefið Boris Johnson forsætisráðherra Breta út þessa viku til að endursemja áætlun sína um Brexit frá grunni.

Hugmyndir Johnsons hafa ekki fallið í góðan jarðveg og Macron segir að það sé Breta að finna lausn á málinu en ekki Evrópusambandsins.

Í Guardian er greint frá því að Johnson hafi farið fram á fund með Macron til að kynna honum tillögurnar en Macron mun hafa hafnað þeirri beiðni.

Í símtali sem þeir áttu síðan í kjölfarið komu þessir afarkostir Macrons fram, að því er segir í blaðinu.

Þá tók Macron það einnig fram að allar slíkar viðræður yrðu að fara í gegnum Michel Barnier, yfirsamningamann ESB, en ekki með viðræðum við einstaka leiðtoga.