Geng Shuang, upplýsingafulltrúi kínverska utanríkisráðuneytisins, fór í dag fram á að bandarískir þingmenn myndu draga til baka frumvarp um stuðning við Hong Kong og mögulegar þvinganir gegn hverjum þeim sem gerast sekir um að pynta mannréttindabaráttufólk í borginni.



Nancy Pelosi, forseti fulltrúadeildar Bandaríkjaþings, kynnti þessa nýjustu útgáfu frumvarpsins í gær með Joshua Wong, mótmælanda frá Hong Kong, sér við hlið.



Amnesty International sagði frá því í gær að lögregla hafi beitt mótmælendur grófu ofbeldi og pyntingum undanfarnar vikur á meðan lögregla varar við ofbeldi af hálfu mótmælenda nú á sextándu viku mótmæla.