Fótbolti

Áttræður ítalskur sjónvarpsmaður í bann fyrir ummæli sín um Romelu Lukaku

Óskar Ófeigur Jónsson skrifar
Romelu Lukaku.
Romelu Lukaku. Getty/Giuseppe Cottini

Rassísk ummæli um Romelu Lukaku kostuðu ítalskan knattspyrnuspeking starfið sitt um helgina.

Ítalska sjónvarpsstöðin Telelombardia ætlar að taka hart á rasískum ummælum starfsmanns síns um fyrrum leikmann Manchester United.

Luciano Passirani var knattspyrnuspekingur í fótboltaþættinum TopCalcio24 á stöðinni en hann er það ekki lengur. Ömurleg ummæli hans um Romelu Lukaku, núverandi leikmann Internazionale Milan, er því um að kenna.

„Ef þú lendir einn á móti einum á móti honum þá myrðir hann þig. Eina leiðin til að bjarga sér úr þeirri stöðu en kannski að gefa honum tíu banana til að borða,“ sagði Luciano Passirani og fékk miklar skammir fyrir.



Luciano Passirani er svo sannarlega fulltrúi gamla tímans en hann er orðinn áttræður. Luciano Passirani baðst um leið afsökunar á ummælum sínum en yfirmaður þáttarins, Fabio Ravezzani, gaf það út að hann yrði ekki með í fleiri TopCalcio24 þáttum.

„Herra Passirani er áttatíu ára gamall og til þess að hrósa Lukaku þá notaði hann myndhverfingu sem var full af kynþáttafordómum,“ sagði Fabio Ravezzani en breska ríkisútvarpið segir frá.  „Þetta var algjört hugsunarleysi hjá honum og ég get ekki látið slíkt viðgangast í okkar þætti,“ sagði Ravezzani.

Romelu Lukaku kom til Internazionale frá Manchester United í haust og hjálpaði ítalska liðinu að vinna 1-0 sigur á Udinese á laugardaginn.

Stuðningsmenn mótherja Internazionale hafa verið með kynþáttafordóma gagnvart Romelu Lukaku í upphafi tímabilsins og hann sjálfur telur að fótboltaheimurinn sé að fara í vitlausa átt í baráttu sinni gegn kynþáttahatri. Framkoma reynslubolta í sjónvarpi er því ekki að hjálpa mikið í baráttunni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.