Sevilla í viðræðum um kaup á Chicharito

Sevilla er í viðræðum við West Ham um kaupin á mexíkóska framherjanum Javier Hernandez.

Hernandez á aðeins tíu mánuði eftir af samningi sínum við Lundúnafélagið. West Ham á því á hættu að missa hann frítt næsta sumar en með sölu í sumar fá Hamrarnir pening inn fyrir framherjann.

Hernandez var ekki í liði West Ham sem vann 2-0 sigur á Norwich í ensku úrvalsdeildinni í gær.

Fyrr í sumar hafði hann greint frá því að West Ham hefði gefið honum leyfi á að fara í sumar.

Hernandez kom til West Ham frá Bayer Leverkusen sumarið 2017. Hann hefur skorað 17 mörk í 63 leikjum fyrir félagið.