Mikael: Svekktur að byrja á bekknum og var ákveðinn að sanna mig

„Ég var ákveðinn að sanna mig. Ég byrjaði á bekknum og var pínulítið svekktur með það. Ég þurfti að sýna hvað ég get og gerði það,“ sagði Mikael Neville Anderson í samtali við Vísi eftir sigur íslenska U-21 árs landsliðsins á Lúxemborg, 3-0, í fyrsta leik sínum í undankeppni EM 2021.

Mikael var ekki í byrjunarliði Íslands en var settur inn á í hálfleik. Hann var ekki lengi að láta til sín taka og aðeins rúmri mínútu eftir að hann kom inn á fiskaði hann vítaspyrnu sem Sveinn Aron Guðjohnsen skoraði úr.

„Við vorum betri en þeir. Við vorum óheppnir í fyrri hálfleik þar sem við skoruðum ekki. Þetta kom svo eftir fyrsta markið,“ sagði Mikael sem leikur með Midtjylland í Danmörku.

„Mörkin voru mjög góð. Þrjú flott mörk og þrjú flott stig,“ bætti hann við.

Næsti leikur Íslands er gegn Armeníu á mánudaginn. Aftur verður leikið á Víkingsvelli. Mikael vill að sjálfsögðu vera í byrjunarliðinu í þeim leik.

„Ég vona það. En við sjáum bara til. Þjálfarinn ræður. Ég vona bara að við vinnum leikinn,“ sagði Mikael að lokum.