Innlent

Fleygðu kaffibolla og kókflösku milli bíla

Stefán Ó. Jónsson skrifar
Það sauð upp úr á Reykjanesbraut í gær.
Það sauð upp úr á Reykjanesbraut í gær. Vísir/Vilhelm

Tveimur ökumönnum lenti saman á Reykjanesbraut síðdegis í gær, ef marka má dagbók lögreglu. Annar þeirra er sagður hafa snöggreiðst þegar hann sá hvernig hinn hagaði sér í umferðinni.

Mennirnir eiga að hafa átt í stuttum samskiptum hvor við annan á rauðu ljósi, sem voru þó ekki til þess fallin að sefa þann arga. Í bræði sinni á ökumaðurinn að hafa kastað kaffibolla út um rúðuna og í bíl „vitleysingsins í umferðinni,“ eins og sá reiði á að hafa lýst honum.

Að hans sögn á vitleysingurinn meðal annars að hafa „ekið á strætóakrein og tekið fram úr fimm bifreiðum.“ Pirraði ökumaðurinn segist hafa furðað sig á þessu og því gefið sig á tal við ökuþórinn á rauðu ljósi til að komast að því hvað honum gengi til.

Þeim spjalltilraunum var þó tekið fálega - ökuníðingurinn á að hafa sagt að hinn afskiptasami ökumaður „væri ekki lögreglan,“ hrækt á bifreið hans og kastað gosflösku sem hafnaði inni í bílnum.

Þá fyrst fauk í forvitna ökumanninn sem á að hafa kastað flöskunni til baka, síðan gripið kaffibolla sem fór sömu leið - „og varð ákoma eftir.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.