Innlent

Tilkynntur til lögreglu fyrir að reykja fisk

Kristín Ólafsdóttir skrifar
Í tilkynningu lögreglu segir að maðurinn hafi staðið að eldamennskunni fyrir utan vinnubúðir í Mosfellsbæ.
Í tilkynningu lögreglu segir að maðurinn hafi staðið að eldamennskunni fyrir utan vinnubúðir í Mosfellsbæ. Vísir/vilhelm

Lögreglunni á höfuðborgarsvæðinu var í gær tilkynnt um mann sem var að reykja fisk við opinn eld í Mosfellsbæ. Í dagbók lögreglu segir að maðurinn, sem er erlendur, hafi verið búinn að koma sér upp „hinni fínustu aðstöðu“ utan við vinnubúðir í bænum.

Ekki þótti hætta stafa af eldamennskunni en maðurinn ákvað þó að slökkva eldinn af tillitssemi við nágranna.

Á áttunda tímanum var tilkynnt um innbrot og þjófnað í geymslur íbúðar í Laugardalnum. Þjófurinn komst á brott með verðmæti.

Þá handtók lögregla þrjá menn í annarlegu ástandi, einn í Kópavogi, annan í Fossvogi og þann þriðja í Breiðholti. Þeir voru allir vistaðir í fangageymslu.

Um áttaleytið var tilkynnt um bát sem hafði hvolft á Elliðavatni. Þar reyndust vera fjögur ungmenni „í góðum gír“, líkt og segir í dagbók lögreglu. Unglingarnir voru að reyna að koma bátnum í land og reyndist engin hætta á ferðum.

Þá hafði lögregla  afskipti af ökumanni bifreiðar við Vesturlandsveg en bifreiðin ók á röngum skráningarnúmerum. Ökumaðurinn er grunaður um fíkniefnaakstur, ítrekaðan akstur sviptur ökuréttindum og vörslu fíkniefna.

Lögregla stöðvaði einnig bifreið í miðbænum þar sem henni var ekið á nagladekkjum. Ökumaðurinn er einnig grunaður um akstur undir áhrifum fíkniefna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.