Innlent

Illa slasaður eftir fjór­hjóla­slys við Geysi

Sunna Kristín Hilmarsdóttir skrifar
Frá vettvangi við Geysi í dag.
Frá vettvangi við Geysi í dag. vísir/mhh

Einn maður var fluttur illa slasaður á sjúkrahús í Reykjavík með þyrlu Landhelgisgæslunnar um hádegisbil í dag eftir fjórhjólaslys við Geysi.

Oddur Árnason, yfirlögregluþjónn hjá lögreglunni á Suðurlandi, segir að maðurinn hafi verið einn á fjórhjólinu þegar honum fipaðist og velti hjólinu. Sjúkrabíll fór á móti þyrlunni sem flutti manninn til Reykjavíkur eins og áður segir.

Oddur vill ekki svara því á hvaða aldri maðurinn væri eða hvort hann væri Íslendingur eða útlendingur. Þá vill hann heldur ekki gefa það upp hvort maðurinn sé talinn í lífshættu.

Tafir urðu á umferð við slysstað í dag. vísir/mhh

Magnús Hlynur Hreiðarsson, fréttamaður okkar, lýsti aðstæðum á vettvangi í hádegisfréttum Bylgjunnar.

Sagði hann greinilegt að orðið hefði alvarlegt umferðarslys, akkúrat við gangbrautina þar sem fólk gengur frá versluninni við Geysi og yfir á sjálft hverasvæðið.

Lögreglubílar, sjúkrabílar og björgunarsveitarmenn voru á vettvangi. Mikið var af ferðamönnum við Geysi eins og venjan er nánast allan ársins hring og þá mynduðust langar bílaraðir í báðar áttir á meðan vinna fór fram á slysstað.





Fréttin var uppfærð klukkan 15:52 með færslu lögreglunnar á Suðurlandi hér fyrir ofan.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.