Jonathan Kodija tryggði Fílabeinsströndinni 1-0 sigur á Suður-Afríku í D-riðil Afríkukeppninnar sem haldinn er í Egyptalandi um þessar mundir.

Kodija er samherji Birkis Bjarnasonar hjá Aston Villa en framherjinn skoraði níu mörk í þeim 39 leikjum sem hann kom við sögu í ensku B-deildinni á síðustu leiktíð. Villa tryggði sig upp í deild þeirra bestu.

Fyrri hálfleikurinn var nokkuð fjörugur þrátt fyrir að vera markalaus. Suður-Afríka fékk fínt færi á 26. mínútu er skalli Lebo Mothiba fór rétt framhjá markinu.

Nicolas Pepe þrumaði boltanum í slá úr aukaspyrnu Fílabeinsstrandarinnar og mínútu síðar slapp Kodija einn gegn markverði Suður-Afríka en lét verja frá sér.

Markalaust var er liðin gengu til búningsherbergja en sárafáir voru mættir til þess að fylgjast með leiknum. Fyrsta og eina markið kom hins vegar á 64. mínútu.

Eftir flott spil upp vinstri vænginn, gaf Max-Alain Gradel frábæra sendingu fyrir markið þar sem Jonathan Kodija var mættur, einn á auðum sjó, og skilaði boltanum í netið.

Fátt markvert gerðist það sem eftir lifði leiksins og Fílabeinsströndin er því komin með þrjú stig eins og Marokkó í D-riðlinum. Namibía og Suður-Afríka eru án stiga.