Innlent

Segir formann fjárlaganefndar fara með tóma vitleysu

Jóhann K. Jóhannsson skrifar

Þingmaður Samfylkingarinnar segir formann fjárlaganefndar fara með tóma vitleysu þegar hann segir að boðaður niðurskurður í fjármálaáætlun ríkisstjórnarinnar, sem nú er til endurskoðunar, bitni ekki á almenningi og fyrirtækjum í landinu. Hann segir ríkisstjórnarflokkanna kasta sprengju inn á Alþingi nú á lokametrum vorþingsins.

Í stöðuuppfærslu þingmanns Samfylkingarinnar á samfélagsmiðlum eftir fundfjárlaganefndar  á föstudag, kom fram að nokkrar breytingar verði gerðar á útgjöldum til málefnasviða ríkisins frá því sem boðað var í fjármálaáætluninni í mars síðastliðnum.

Í máli sínu segir þingmaðurinn að breytingarnar verði áþreifanlegar þó mest í málefnum öryrkja þar sem hann segir að átta milljarðar verði teknir af á næstu fimm árum, en einnig verða útgjöld til umhverfismála, framhaldsskóla, sjúkrahúsþjónustu, löggæslu og samgöngumála lækkuð.

Willum Þór Þórsson, formaður fjárlaganefndar og þingmaður Framsóknarflokksins. Vísir/Vilhelm

Segir engan niðurskurð á næsta ári

Formaður fjárlaganefndar segir orð þingmanns Samfylkingarinnar um niðurskurð og breytingar á fjármálaáætlun rakalausan. Hann segir engan koma til með að finna fyrir breytingum á áður boðaðri aukningu til málefnasviða ríkisins á næsta ári.

„Um leið og ég umber það að menn séu í pólitík að þá auðvitað fylgir orðum ábyrgð og það er ekki um neinn niðurskurð að ræða. Fólk sem að situr heima og hlustar á þetta, sérstaklega ef við erum að tala um viðkvæmari hópa samfélagsins sem eru kannski ekki of sælir af sínu, gætu trúað því að það væri verið að taka þeirra bætur niður,“ segir Willum.

Fall WOW Air og loðnu brestur eru sagðar helstu ástæður þess að fjármálaáætlun ríkisstjórnarinnar er tekin til endurskoðunar. Í ljósi þess sem var að gerast í þjóðfélaginu þegar gildandi fjármálaáætlun var lögð fram í mars er spurning um hvort menn hafi verið of bjartsýnir við gerð þeirrar áætlunar. „Ég ætla ekkert að neita því. Meðal annars fjármálaráð hefur bent á það að veikleikinn í fjármálastjórninni hefur kannski fyrst og fremst falist í því að við höfum verið í gólfi stefnunnar,“ segir Willum.

Miðað við þessar breytingartillögur mun almenningur og fyrirtækin í landinu finna fyrir þessum niðurskurði?

„Ég fullyrði það ekki inn á árið 2020,“ segir Willum.

Ágúst Ólafur Ágústsson, þingmaður Samfylkingarinnar. Vísir/Vilhelm

Segir formann fjárlaganefndar fara með tóma vitleysu

„Það er auðvitað bara tóm vitleysa hjá honum og ég vísa þessari gagnrýni fullkomlega til föðurhúsanna. hann og hans flokkur og ríkisstjórnarflokkarnir eru að leggja til að við erum að fara setja minni fjármuni til öryrkja, framhaldskóla, sjúkrahúsa, samgöngumála og svo framvegis, heldur en þau voru búin að ákveða fyrir einungis tveimur mánuðum. það er stór pólitísk tíðindi og mér finnst ríkisstjórnarflokkarnir vera að kasta inn sprengju inn á þingið á loka metrum þess,“ segir Ágúst Ólafur Ágústsson, þingmaður Samfylkingarinnar.

Engin starfsáætlun er í gildi á alþingi og óvíst hvenær þingmenn komast í sumarfrí. Spurning er hvort þetta mál verði til þess að þingfundir dragist enn lengra inn í sumarið.

„Ég á ekki von á því en við gefum okkur hins vegar góðan tíma í umræður,“ segir Willum.
 
 


Tengdar fréttir

Í áfalli vegna fjármálaáætlunar

Þingmaður Samfylkingarinnar segir breytingartillögur í fjármálaáætlun ríkisstjórnarinnar, vegna breyttra aðstæðna í hagkerfinu og koma á óvart. Hann segir grunn hagstjórnar á Íslandi afskapleg veikan.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.