Alfreð: Byrjar vel eftir þrítugt

Alfreð Finnbogason, landsliðsmaður og framherji Augsburg, fagnaði þrítugsafmælinu á föstudagskvöldið og fagnaði stórafmælinu með þrennu daginn eftir í þýsku úrvalsdeildinni.

Alfreð skoraði þrjú mörk í 3-0 sigri Augsburg á Mainz. Alfreð skoraði tvö mörk úr vítaspyrnum í fyrri hálfleik en þriðja markið kom í síðari hálfleik eftir laglegt samspil. Kappinn var í viðtali í morgunþættinum Brennslunni í morgun.

„Ég er nokkur góður. Ég tek þrítugsafmælinu fagnandi og þetta byrjar vel eftir þrítugt. Ég get ekki kvartað,“ sagði Alfreð í samtali við Brennsluna í morgun.

„Það var mjög gott liðsmark. Þetta var kærkomið. Við vorum ekki búnir að vinna í tíu leiki í röð og það var kaós í klúbbnum í vikunni. Tveimur leikmönnum var hent út og nýr aðstoðarþjálfari og margir að bíða eftir því hvernig leikurinn myndi koma út.“

„Við erum aðeins búnir að sökkva niður í fallslaginn og á alla vegu var þetta gífurlega mikilvægur sigur fyrir okkur.“

Alfreð var næst spurður að því hvernig honum væri tekið á knæpum bæjarins eftir að hafa skorað þrjú mörk um helgina en Alfreð segir að Þjóðverjinn sé líkur Íslendingnum.

„Þjóðverjinn er eins og Íslendingurinn, svolítið að halda aftur að sér nema að hann sé kominn í glas. Þá segja þeir allt sem þeir vilja segja. Ég fann meira fyrir þessu á Spáni og í Grikklandi.“

„Þá komu bara allir að þér og sögðu hvað þeim fannst. Þar er opnara fólk en þú sérð að fólk horfir á þig og það er bara eitt fótboltalið hérna. Það þekkja allir þessa tuttugu leikmenn sem eru í liðinu. Það er skemmtilegra að fólk horfi á þig eftir þrennu en að þú hafir klúðrað dauðafæri og liðið tapar tíu leikjum í röð.“

Kom til mín í hálfleik og sagði að ég þyrfti að hlaupa meira

Jens Lehmann, fyrrum landsliðsmarkvörður Þýskalands og markvörður Arsenal, er kominn inn í þjálfarateymi Augsburg og Alfreð segir að hann sé strax byrjaður að láta til sín taka.

„Hann er að koma sterkur inn. Strax á fyrstu æfingu var hann óhræddur við að segja hvað honum finnst og maður fann að tempóið og gæðin hækkuðu um nokkur prósent eftir að hann kom.“

„Það var mjög skemmtilegt í hálfleik í gær. Það gekk vel í fyrri hálfleik og skoruðum tvö mörk og allir voru að klappa manni á bakið. Svo kemur að hann að mér með mjög einföld fyrirmæli."

„Hann sagði að í seinni hálfleik yrði ég að hlaupa meira. Ég sagði bara: Ég skal gera það. Hann er greinilega að taka "bad-cop" á sig svo það er gott mix í þjálfarateyminu.“

Alfreð hefur verið sjóðandi heitur með Augsburg. Í síðustu 35 leikjum í þýsku úrvalsdeildinni hefur hann skorað 22 mörk. Hann er nokkuð sáttur með tölfræðina en er hógvær eins og alltaf.

„Ég held að það sé bara sama og alltaf. Mér líður vel og ég passa vel inn í liðið. Ég fæ mikið sjálfstraust frá liðinu og ég held að það sé nokkurnveginn allstaðar sem ég hef verið að því mikilvægari sem ég er liðinu hefur mér gengið vel.“

Allt viðtalið við Alfreð má heyra í sjónvarpsglugganum efst í fréttinni.