Andlát: Björgvin Guðmundsson

Björgvin Guðmundsson er látinn, 86 ára að aldri. Hann fæddist 13. september árið 1932 í Reykjavík en lést í gær. Foreldrar hans voru Guðmundur Marel Kjartansson verkamaður og Katrín Jónsdóttir húsmóðir.

Kona Björgvins var Dagrún Þorvaldsdóttir sem lést árið 2015. Saman áttu þau sex börn.

Hann lauk stúdentsprófi frá Menntaskólanum í Reykjavík árið 1953 og viðskiptafræði frá Háskóla Íslands árið 1958.

Björgvin starfaði lengi sem blaðamaður og fréttaritstjóri við Alþýðublaðið og Vísi, eða um ellefu ára skeið. Hann var umsjónarmaður Efst á baugi hjá Ríkisútvarpinu í 10 ár, forstjóri BÚR í tvö ár, framkvæmdastjóri Íslensks nýfisks í 9 ár, starfsmaður stjórnarráðsins í 28 ár, skrifstofustjóri í viðskiptaráðuneytinu og sendifulltrúi í utanríkisráðuneytinu.

Hann var borgarfulltrúi og borgarráðsmaður fyrir Alþýðuflokkinn í 12 ár, ásamt því að vera formaður borgarráðs í 1 ár. Þá var hann lengi vel formaður kjaranefndar Félags eldri borgara í Reykjavík og greinar hans um bætt kjör eldri borgara áberandi á síðum fjölmiðla.