Enginn fær að fara frá Chelsea ef félagsskiptabannið stendur

Ef félagsskiptabann Chelsea stendur þá mun félagið ekki leyfa neinum leikmanni að yfirgefa félagið. Þetta segir danski varnarmaðurinn Andreas Christensen.

FIFA setti Chelsea í félagsskiptabann næstu tvo félagsskiptaglugga vegna brota á reglum varðandi félagsskipti ungra leikmanna. Chelsea neitar sök og hefur áfrýjað banninu.

Áfrýjunin verður tekin fyrir 11. apríl en ef bannið stendur getur Chelsea farið með málið fyrir íþróttadómstólinn CAS (e. Court of Arbitration for Sport).

Chelsea bað um að bannið yrði sett til hliðar á meðan málsmeðferð stæði yfir, en þeirri ósk var hafnað og hefur málið þegar haft áhrif innan félagsins.

Daninn Christensen hefur aðeins komið við sögu í þremur úrvalsdeildarleikjum undir Maurizio Sarri og hefur haft augastað á að breyta um félag.

„Skilaboðin sem við fengum eru að Chelsea vill halda öllum leikmönnunum út af þessu máli. Það er mjög erfitt fyrir mig að samþykkja þessa stöðu,“ sagði Christensen við Ekstra Bladet.

„Ég hef reynt að sanna mig á æfingasvæðinu en það er erfitt þar sem við æfum takmarkað þegar leikjaálagið er mikið.“

Christensen er ekki eini leikmaðurinn sem Chelsea þarf að halda í í sumar. Eden Hazard er ítrekað orðaður frá félaginu og síðustu misseri hefur hann virst líklegri til þess að færa sig um set. Hann segir þó sögusagnir um að hann hafi nú þegar gert samkomulag við Real Madrid ekki sannar.

Samningur Hazard rennur út sumarið 2020, þegar Chelsea mætti þá kaupa inn nýja leikmenn á ný ef bannið stendur. Þá gæti hann hins vegar farið frítt frá félaginu svo Chelsea þarf annað hvort að selja Hazard í sumar til þess að fá eitthvað fyrir hann eða reyna að sannfæra hann um að skrifa undir nýjan samning.