Gerir Manchester United Sancho að fyrsta enska 100 milljóna punda leikmanninum?

Manchester United er tilbúið að  keppa við PSG um ungstirnið Jadon Sancho sem hefur farið á kostum með Borussia Dortmund það sem af er leiktíðinni.

Sancho gæti orðið fyrsti enski knattspyrnumaðurinn sem mun kosta meira en hundrað milljónir punda en hann er ofarlega á óskalista PSG og Manchester United.

Þessi sömu lið mætast einmitt í Meistaradeildinni annað kvöld er síðari leikur liðanna í 16-liða úrslitunum fer fram. PSG er í góðri stöðu eftir að hafa unnið fyrri leik liðanna á Old Trafford 2-0.

EXCLUSIVE: Manchester United face £100m tug-of-war for Jadon Sancho with PSG | @TelegraphDuckerhttps://t.co/reSFiYPs4f

— Telegraph Football (@TeleFootball) March 4, 2019

Sancho sem er einungis átján ára gamall hefur leikið á alls oddi á leiktíðinni. Í þeim 24 leikjum sem hann hefur komið við sögu í þýsku úrvalsdeildinni hefur hann skorað átta mörk og gefið tíu stoðsendingar.

Dýrasti enski leikmaðurinn sem keyptur hefur verið er Kyle Walker en hann var keyptur frá Tottenham til Manchester City á 53 milljónir punda. Dortmund er sagt vilja yfir hundrað milljónir punda vilji félögin kaupa enska landsliðsmanninn frá Þýskalandi.

Sancho gekk í raðir Dortmund sumarið 2017 eftir að hafa ekki fengið tækifæri hjá Manchester City þar sem hann hafði leikið í tvö ár en hann er uppalinn hjá Watford. Sancho hefur leikið þrjá landsleiki.