Erlent

Brenndu hjálpargögn og skutu á mótmælendur

Samúel Karl Ólason skrifar
Hermennirnir skutu táragasi og gúmmíkúlum að mótmælendum en mannréttindasamtök og vitni segja raunverulegum kúlum einnig hafa verið skotið.
Hermennirnir skutu táragasi og gúmmíkúlum að mótmælendum en mannréttindasamtök og vitni segja raunverulegum kúlum einnig hafa verið skotið. AP/Fernando Llano
Hermenn hliðhollir Nicolas Maduro, forseta Venesúela, beittu valdi til að reka bílalestir með hjálpargögn frá landamærum ríkisins og Kólumbíu í nótt. Hermennirnir skutu táragasi og gúmmíkúlum að mótmælendum en mannréttindasamtök og vitni segja raunverulegum kúlum einnig hafa verið skotið. Minnst tveir eru látnir, 300 slasaðir og kveikt var í einhverjum bílum sem báru hjálpargögn.



Í kjölfarið kallaði Juan Guaidó, sem þing Venesúela hefur skipað sem forseta, eftir því að alþjóðasamfélagið „íhugaði allar leiðir“ til að koma Maduro frá völdum og „frelsa“ íbúa Venesúela.



Hann hvatti hermenn Venesúela einnig til að hleypa hjálpargögnum inn í landið.



„Hve margir ykkar eiga veikar mæður? Hve marga krakka í skóla án matar?“ sagði hann samkvæmt AP fréttaveitunni. „Þið skuldið enga hollustu til sadista, sem fagnar því að meinaður sé aðgangur að hjálpargögnum sem þjóðin þarf á að halda.“



Yfirvöld Kólumbíu segja um 60 hermenn hafa svarað kalli Guaidó en þeir hafi allir verið lágt settir. Enn sem komið er nýtur Maduro fulls stuðnings hershöfðingja Venesúela.

Mótmælendum tókst að koma þremur flutningabílum yfir landamærin en kveikt var í þeim og segja vitni að hermenn hafi gert það.



Venesúela hefur gengið í gegnum mikla erfiðleika á undanförnum árum og þá sérstaklega þegar kemur að efnahag landsins. Í fyrra var verðbólga svo há í Venesúela að verðlag tvöfaldaðist á nítján daga fresti að meðaltali. Matar- og lyfjaskortur hefur leikið íbúa landsins grátt og hafa minnst þrjár milljónir manna flúið land.



Maduro hefur slitið stjórnmálasamskiptum við Kólumbíu og sakar ríkisstjórn landsins, sem hann kallaði fasista, um að reyna að hjálpa Bandaríkjunum að velta honum úr sessi. Flest ríki Suður-Ameríku hafa lýst yfir stuðningi við Guaidó.

Tveggja forseta tal

Maduro sór embættiseið í síðasta mánuði. Það gerði hann eftir umdeildar forsetakosningar sem fram fóru í maí í fyrra.



Eftir að stjórnarandstaðan náði meirihluta á þingi árið 2015 skipaði Maduro nýtt þing árið 2017, stjórnlagaþing, og færði flest völd gamla þingsins yfir á það. Þar að auki skipaði hann fjölmarga bandamenn sína í Hæstarétt Venesúela.



Hann sór embættiseið í byrjun ársins eftir kosningar sem stjórnarandstaðan viðurkenndi ekki og eftirlitsaðilar segja ekki hafa farið rétt fram, meðal annars vegna þess að mörgum andstæðingum Maduro var meinað að taka þátt í þeim. Í kjölfar þess lýsti gamla þingið Guaidó starfandi forseta Venesúela.



Guaidó segir að samkvæmt stjórnarskrá Venesúela megi þingið skipa forseta þess sem forseta sé forsetinn ólögmætur. Markmið hans er að mynda starfsstjórn og boða til nýrra kosninga. Eftir að þingið tilnefndi hann sem forseta ferðaðist hann um Suður-Ameríku og aflaði stuðnings nágrannaríkja Venesúela.



Tugir annarra þjóða hafa lýst yfir stuðningi við Guaidó og mun hann fara til Bogota í Kólumbíu á morgun til að hitta þjóðarleiðtoga annarra Suður-Ameríkuríkja og Mike Pence, varaforseta Bandaríkjanna.


Tengdar fréttir

Hafnar fullyrðingum um herlið í Venesúela

Bruno Rodriguez, utanríkisráðherra Kúbu, hafnar fullyrðingum ríkistjórnar Donald Trump Bandaríkjaforseta um að Kúba sé með herlið í Venesúela.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.