Þægileg byrjun hjá bæði Liverpool og Manchester United: Risaleikur í fyrstu umferð

Það verður sannkallaður stórleikur í fyrstu umferð ensku úrvalsdeildarinnar en í morgun var leikjaröðun næsta tímabils í ensku úrvalsdeildinni gerð opinber.

Unai Emery fær heimaleik í fyrsta deildarleik sem knattspyrnustjóri Arsenal en mótherjinn er ekki af lakari gerðinni eða Englandsmeistarar Manchester City.

Ekki verður það mikið léttara í næsta leik á eftir því þá heimsækir Arsenal lið Chelsea.

Arsenal spilar heimaleikinn á móti nágrönnum sínum í Tottenham 1. desember en Tottenham tekur síðan á móti Arsenal 2. mars.

Fyrsti leikur Tottenham á nýja leikvanginum sínum verður á móti Liverpool helgina 15. til 16. september.

Next season's opening Premier League fixtures: Unai Emery's Arsenal tenure starts at home to the champions #PremierLeaguefixtureshttps://t.co/IaBQNYMqPJpic.twitter.com/hDwe4d1743

— Telegraph Football (@TeleFootball) June 14, 2018

Þessi fyrsti leikur er án efa sá erfiðasti hjá Manchester City í upphafi móts því svo taka við leikir á móti Huddersfield, Wolves, Newcastle, Fulham, Cardiff City og Brighton.

Fyrri Manchester slagurinn er 10. nóvember á Etihad en liðin mætast svo á Old Trafford 16. mars.

Manchester United hefur allt til alls til að byrja vel því í fyrstu sjö umferðunum spila United-menn við Leicester City, Brighton, Burnley, Watford, Wolves, West Ham og Newcastle.

Liverpool á frekar þægilega byrjun. Fyrstu fjórir leikir liðsins eru á móti West Ham, Crystal Palace, Brighton og Leicester en svo taka við svakalegar þrjár vikur þar sem lærisveinar Jürgen Klopp spila við Tottenham, Chelsea og Manchester City.

Enska úrvalsdeildin hefst 11. ágúst og lýkur síðan 19. maí 2019. Fjórar umferðir fara fram áður en kemur að fyrsta landsleikjahléinu sem er í byrjun september.

Hér má nálgast allar umferðirnar.