Liverpool Echo: Einn leikmaður Cardiff City vonar að Gylfi geti spilað á morgun

Aron Einar Gunnarsson var í viðtali hjá Liverpool Echo vegna leiks Cardiff City á móti Everton  í ensku úrvalsdeildinni á morgun. Umræðuefnið þarf nú ekki að koma óvart enda er blaðið í Bítlaborginni og með Everton leikur góður félagi hans úr íslenska landsliðinu.

Aron Einar fer þarna yfir góðan vinskap sinn og Gylfa Þórs Sigurðssonar en þeir hafa verið miklir félagar síðan að þeir hittust fyrst í íslenska sautján ára landsliðinu. Saman hafa þeir síðan farið fyrir íslenska knattspyrnulandsliðinu í ævintýrum þess á undanförnum árum.

Gylfi er að koma til baka eftir meiðsli en af þeim sökum gat Gylfi ekki verið með íslenska landsliðinu í leikjum á móti Belgíu og Katar. Aron Einar spilaði aftur á móti sinn fyrsta landsleik í nokkurn tíma á móti Belgíu.

Blaðamaður Liverpool Echo hefur það eftir Aroni Einari að hann fái tækifæri til að mæta vini sínum á miðjunni á Goodison Park á morgun.

„Everton liðið hefur verið að standa sig betur en á síðustu leiktíð. Nýi stjórinn þeirra hefur breytt mörgum hlutum hjá þeim,“ sagði Aron Einar Gunnarsson.

„Ég hef auðvitað talað við Gylfa en ég veit ekki hvort hann verði hundrað prósent klár því hann var ekki með íslenska landsliðinu í síðustu viku,“ sagði Aron Einar og notaði tækifærið til að gagnrýna tæklingu Chelsea mannsins Jorginho á Gylfa. Gylfi meiddist á ökkla við hana.

„Þetta var ekki falleg tækling frá Jorginho. Þetta var ljótt að sjá ekki síst að þarna var maður sem ég þekki vel. Þetta var glannarlegt og leit ekki vel út í hægri endursýningu,“ sagði Aron.

The reason why one Cardiff City player is hoping Gylfi Sigurdsson is fit to play for Everton this weekend https://t.co/HBynvyZzsx#everton#efc#toffees

— Everton FC Live News (@efcliveupdates) November 23, 2018

Aron Einar hrósar Gylfa fyrir frammistöðu sína í vetur.

„Gylfi hefur staðið sig mjög vel en við vitum hvað hann getur og nú er hann að spila sína uppáhaldsstöðu. Auk hæfileikanna og tækninnar þá er einn duglegasti leikmaðurinn. Ég veit hversu mikilvægur hann hefur verið fyrir íslenska landsliðið og nú er hann að gera það sama fyrir Everton, að gefa stoðsendingar og skora mörk,“ sagði Aron.

„Það verður krefjandi verkefni að stoppa hann en það er ekki bara hann því það eru fleiri leikmenn í Everton liðinu sem hafa verið að spila vel á leiktíðinni. Ég hlakka samt til að mæta Gylfa á ný,“ sagði Aron.

„Við hittumst fyrst með sautján ára landsliðinu í leik á móti Danmörku. Ég er að norðan og það var í fyrsta sinn sem ég hitti þessa stráka að sunnan,“ sagði Aron.

„Við tölum núna saman á hverjum degi. Við höfum þekkst síðan við vorum sautján ára gamlir og þekkjum því hvorn annan mjög vel. Ég veit vel hvað hann getur. Ég þekki hans kosti og hans galla. Þeir eru ekki margir en nokkrir,“ sagði Aron.

„Gylfi var hjá Tottenham síðast þegar við vorum báðir í ensku úrvalsdeildinni. Ég man vel þegar við mættumst. Það er ekki auðvelt en þegar leikurinn er flautaður á þá snýst allt um að ná í stigin þrjú. Ég nýt þess samt að mæta félaga mínum í landsliðinu og hef þá eitthvað auka til að hlakka til eftir leikinn,“ sagði Aron Einar en það má lesa allt viðtalið við hann hér.