Leik Leicester á laugardaginn ekki frestað

Leikur Leicester gegn Cardiff í ensku úrvalsdeildinni verður spilaður á laugardaginn þrátt fyrir harmleik helgarinnar. Leikmenn og stjórnarmenn Leicester voru spurðir álits.

Eigandi Leicester, Vichai Srivaddhanaprabha, var einn fimm sem lést á laugardagskvöldið er flugvél brotlenti rétt fyrir utan leikvang liðsins eftir að Leicester hafði gert 1-1 jafntefli við West Ham.

Leikmenn liðsins voru spurðir um álit hvort að fresta ætti leik liðsins gegn Aroni Einari Gunnarssyni og félögum í Cardiff á laugardaginn en nú hefur félagið staðfest að leikurinn verður spilaður á laugardag.

Aiyawatt Srivaddhanaprabha, sonur Vichai, vildi að liðið myndi spila á laugardaginn því faðir hans hefði viljað það. Stjórnarformenn félagsins eru einnig sammála um að spila leikinn á laugardag.

Mínútu þögn verður fyrir leikinn og einnig mun liðið leika með sorgarbönd til heiðurs Vichai en leik liðsins gegn Southmapton, sem átti að fara fram annað kvöld, hefur verið frestað.