Guardiola pirraður því Luiz fékk ekki atvinnuleyfi

Pep Guardiola, stjóri Man. City, staðfesti í dag að félaginu hafi mistekist að fá atvinnuleyfi fyrir Douglas Luiz og spilar hann því ekki með félaginu á komandi leiktíð.

Hinn 20 ára gamli Douglas gekk í raðir City fyrir ári síðan fyrir tíu milljónir punda. Hann var lánaður til Girona á síðustu leiktíð og líklegt er að það verði aftur raunin á þessari leiktíð.

Guardiola hafði vonast til að Luiz myndi gefa honum fleiri möguleika á miðsvæðinu en að endingu tókst ekki að fá atvinnuleyfi fyrir hann. Guardiola var ekki skemmt.

„Hann fær ekki leyfi. Við reynum að koma honum á lán og reyna fá atvinnuleyfi. Það er svo erfitt fyrir mig að skilja þetta,” sagði Guardiola og hélt áfram:

„Einhver sem sér aldrei leikmanninn ákveður hvort að hann hafi hæfileikina til að spila eða ekki. Ég samþykki reglurnar en ég skil þetta ekki.

„Ég er vonsvikinn og sár fyrir Douglas því hann hefði hjálpað okkur,” sagði Guardiola vel pirraður.