Klopp um ummæli Mourinho: „Eitt af markmiðum mínum er að láta Jose brosa“

Jurgen Klopp segir að ummæli Jose Mourinho í vikunni um að Liverpool ætti að vinna titil á næstu leiktíð sé hluti af hugarleikjum Mourinho.

Mourinho sagði í vikunni að miðað við það sem Liverpool hefur eytt í leikmenn þyrfti liðið að ná einhverjum árangri.

Portúgalinn sagði einnig það væri fyndið að Klopp hafi breytt skoðun sinni hvað varðar kaup á dýrum leikmönnum.

„Já, ég held það að hluta til, en það er allt í lagi," sagði Klopp aðspurður um hvort að Mourinho væri með hugarleiki í gangi.

„En ég heyrði einnig að Jose fyndist ég fyndinn og það er eitt af markmiðum mínum í lífinu að láta Jose brosa."

„Það gerist ekki oft og ef það gerðist vegna Liverpool, vel gert! Ég hef sagt einhverja hluti. Ég man ekki allt en ég veit hvað ég sagði um Pogba."