Fengu ekki leyfi til að nota lestur Katrínar í auglýsingu

Ríkisútvarpið bað forsætisráðherra ekki um leyfi til að nota lestur hennar á broti úr þjóðsöng Íslands í auglýsingaskyni. Forsætisráðuneytið hefur auglýsinguna nú til skoðunar vegna mögulegra brota á lögum um þjóðsönginn, en ráðherra kveðst ekki vanhæf til að fjalla um málið.

Í auglýsingunni sem sýnd var í júní má heyra þekkta einstaklinga á borð við forsetann fyrrverandi, frú Vigdísi Finnbogadóttur, lesa brot úr þjóðsöngnum Ó Guð vors lands. Í lokin hljómar svo setningin „RÚV – Okkar allra“ og merki stöðvarinnar sést í mynd.

Bannað að flytja sönginn í annarri mynd

Líkt og fjallað var um í kvöldfréttum 25. júní er líklegt auglýsingin brjóti gegn lögum um þjóðsönginn. Þar segir að sönginn skuli ekki flytja eða birta í annarri mynd en hinni upprunalegu gerð og ekki sé heimilt að nota sönginn á nokkurn hátt í viðskipta- eða auglýsingaskyni.

Frétt Stöðvar 2: Forsætisráðuneytið skoðar möguleg brot RÚV

Málið hefur undanfarnar vikur verið til skoðunar hjá forsætisráðuneytinu, en lögum samkvæmt sker forsætisráðherra úr ef ágreiningur rís um rétta notkun söngsins. Slík skoðun gæti þó reynst erfið innan ráðuneytisins, þar sem forsætisráðherrann Katrín Jakobsdóttir les sjálf brot úr þjóðsöngnum inni í auglýsingunni.

Ekkert talað um auglýsingu af hálfu RÚV

„Ríkisútvarpið leitaði til ýmissa einstaklinga, þar á meðal mín, um að lesa upp einstaka línur úr þjóðsöngnum í myndband vegna Heimsmeistaramótsins í knattspyrnu. Þar kom raunar ekki fram að þetta yrði nýtt í auglýsingaskyni,“ segir Katrín, aðspurð hvernig aðkoma hennar að auglýsingunni komi til.

Ráðuneytið sendi RÚV bréf í upphafi júlímánaðar þar sem óskað var skýringa á notkun þjóðsöngsins í auglýsingunni og er nú beðið svara. Katrín telur ráðuneyti sitt ekki vanhæft til að fjalla um málið.

Taka mögulegt vanhæfi til skoðunar

„Í ljósi þess að við höfðum ekki vitneskju um að þetta yrði nýtt í auglýsingaskyni þá teljum við ekki að það geti valdið vanhæfi, en við munum að sjálfsögðu taka það til sérstakrar skoðunar í framhaldi málsins,“ segir Katrín.

Brot á lögunum varða sektum eða allt að tveggja ára fangelsi. Auglýsingin var bæði birt með tilvísun til HM umfjöllunar RÚV og án slíkrar tilvísunar og endaði þá aðeins á orðunum RÚV – okkar allra. Í skriflegu svari RÚV til fréttastofu í júní sagði hins vegar að aðeins ljóðið væri flutt, en ekki söngurinn í heild sinni. Teldi stofnunin því að hinn eiginlegi þjóðsöngur væri ekki notaður. Þá væri ekki um að ræða auglýsingu í skilningi laganna, heldur dagskrárkynningu.