Vagnstjóri grunaður um ölvunarakstur: „Þetta er náttúrulega grafalvarlegt“

Strætisvagnstjóri er í haldi lögreglu grunaður um ölvun við akstur eftir að hafa ekið á tvær bifreiðar í Kópavogi í gær. Vagnstjórinn verður yfirheyrður eftir hádegi, en forsvarsmenn Strætó líta málið alvarlegum augum.

Tilkynnt var um atvikið á sjötta tímanum í gær, en vagninum var ekið á miklum hraða á tvær bifreiðar í hringtorgi á gatnamótum Dalvegs og Smiðjuvegs í Kópavogi. Strætisvagninn var á svo mikilli ferð að hann hafnaði upp á umferðareyju eftir að hafa rekist á bílana tvo. Guðmundur Heiðar Helgason er markaðs- og upplýsingafulltrú Strætó.

Strætó harmar atvikið

„Miðað við hvað ölvunarakstur yfir höfuð er alvarlegt brot, og að við erum fyrirtæki sem er að keyra almenning á öllum aldri, þá er þetta ennþá alvarlegra í okkar tilviki. Þannig að þetta mál er náttúrulega grafalvarlegt og við hörmum það sem gerðist þarna í gær,“ segir Guðmundur Heiðar.

Vagnstjórinn var handtekinn og vistaður í fangageymslu lögreglu þar sem hann er enn, en samkvæmt upplýsingum vakthafandi lögreglufulltrúa verður hann yfirheyrður eftir hádegi vegna gruns um ölvunarakstur.

„Við leyfum náttúrulega lögreglunni að klára fyrst sitt mál gagnvart bílstjóranum og sjáum hvað kemur út úr því, en ég get svosem fullyrt að ef þetta er rétt að hann hafi verið ölvaður þá á hann ekki afturkvæmt aftur til starfa hjá okkur,“ segir Guðmundur Heiðar.



Fer sína leið innan trygginganna

Guðmundur Heiðar hefur ekki upplýsingar um meiðsli farþega í vagninum sjálfum, en ökumaður og farþegar í annarri bifreiðinni sem vagninum var ekið á kvörtuðu hins vegar undan eymslum í hálsi og höfði.

„Við hvetjum náttúrulega alla til að fara og fá viðeigandi áverkavottorð. Svo þarf málið bara að fara viðeigandi leið innan trygginganna, en við hvetjum alla til að gera það og hægt er að hafa samband við okkar þjónustuver ef vantar frekari upplýsingar.“