Grobbelaar: Karius á að fá annan séns

Fyrrum markvörður Liverpool, Bruce Grobbelaar, segir Loris Karius eiga skilið að fá annan séns hjá félaginu eftir mistökin hræðilegu sem Þjóðverjinn gerði í úrslitaleik Meistaradeildar Evrópu um síðustu helgi.

Karius gaf Real Madrid tvö mörk í úrslitaleiknum, sem endaði 3-1 fyrir spænska liðið, þegar hann gerði sig sekan um hrikaleg mistök og hafa margir lýst því yfir að dagar hans hjá Liverpool séu taldir.

Grobbelaar, sem vann sex titla á þrettán árum á Anfield, sagði að Karius ætti skilið annan séns.

„Ég fékk tvö ár uppfull af auka sénsum svo afhverju ættu þeir ekki að gefa honum annan séns eftir einn leik?“ sagði Grobbelaar við BBC.

„Þeir ættu að halda honum í sviðsljósinu á næsta tímabili. Koma honum aftur í leik eins fljótt og hægt er.“