United vill ekki láta Martial fara fyrir Alderweireld

Manchester United vill festa kaup á varnarmanninum Toby Alderweireld frá Tottenham. Forráðamenn félagsins vilja þó ekki setja upp neinn skiptidíl með Anthony Martial.

Einn háværasti slúðurorðrómurinn í félagsskiptamálum í enska boltanum til þessa er að United ætli að gera sitt allra besta til þess að næla í Alderweireld frá Tottenham. Því hefur verið kastað fram að Spurs vilji fá Martial í staðinn þar sem Lundúnaliðið hefur áhuga á Frakkanum.

Martial er farinn að missa þolinmæðina gagnvart litlum spilatíma hjá United eftir komu Alexis Sanchez og segir sagan að hann vilji komast burt frá Old Trafford.

Samkvæmt heimildum ESPN vill United hins vegar halda sóknarmanninum og ætlar ekki að taka á móti neinum tilboðum í Frakkann nema hann sjálfur ýtir á eftir sölu.

Alderweireld á tvö ár eftir á samningi sínum hjá Tottenham en félagið er tilbúið að láta hann fara fyrir um 50 milljónir punda.