Sýknuð af aðild að skotárásinni á Pulse

Noor Salman, ekkja árásarmannsins sem skaut 49 manns til bana á skemmtistaðnum Pulse í Orlando, hefur verið sýknuð fyrir aðild að árásinni. Salman var ákærð fyrir að vera vitorðsmaður að hryðjuverkaárásinni og að hindra framgang réttvísinnar. BBC greinir frá.

Omar varð 49 manns að bana í skotárás á skemmtistaðnum sem er vinsæll meðal hinsegin fólks í Orlando í júní árið 2016. Omar lýsti jafnframt yfir stuðningi við Ríki Íslams í símtali sem hann átti við samningamenn lögreglu í þriggja tíma umsátri sem lauk með því að hann var skotinn til bana af lögreglu.

Sögð einföld og undirokuð

Noor sagði FBI eftir árásina að hún hefði verið með honum þegar hann keypti skotfæri og hulstur. Þá á hún einnig að hafa sagt fulltrúunum að hún hafi einu sinni ekið honum á Pulse því hann vildi kanna aðstæður. Hún segist þó hafa reynt að tala hann af árásinni.

Við réttarhöld kom fram að Noor hafi verið undirokuð í hjónabandinu og sögðu verjendur hennar að hún hafi verið gift skrímsli. Þá sagði Charles Swift, lögmaður hennar, að hún hafi ekki aðhyllst öfgaskoðanir eiginmanns hennar. Einnig kom fram að Noor hafi lága greindarvísitölu og að Omar hafi verið stjórnsamur.