Leiðtogi katalónskra sjálfstæðissinna handtekinn í Þýskalandi

Carles Puigdemont, fyrrverandi forseti heimastjórnarinnar í Katalóníu, var handtekinn af þýsku lögreglunni við landamæri Danmerkur í dag. AP fréttaveitan greinir frá þessu.

James Alonso-Cuevillas, lögmaður Puigdemont, staðfesti í samtali við AP að þýska lögreglan hafi handtekið hann í dag þegar hann var á leið frá Danmörku til Þýskalands. Þá segir hann að Puigdemont hafi verið á leið aftur til Belgíu en hann hefur hafst við í Brussel eftir að spænsk yfirvöld gáfu út handtökuskipun á hendur honum í kjölfar sjálfstæðisyfirlýsingar katalónska þingsins. Spænsk stjórnvöld gáfu út alþjóðlega handtökuskipun á hendur Puigdemont þegar hann var í Finnlandi fyrr í mánuðinum.

Um 25 aðskilnaðarsinnar hafa verið ákærðir eftir þjóðaratkvæðagreiðslu um sjálfstæði Katalóníu síðastliðinn október en spænskir dómstólar úrskurðuðu atkvæðagreiðsluna ólöglega.

Síðastliðið föstudagskvöld kom til óeirða í Katalóníu eftir að spænskir dómstólar úrskurðuðu fimm leiðtoga katalónskra sjálfstæðissinna í varðhald, þar á meðal Jordi Turull, forsetaefni þeirra.