Mourinho reiknar ekki með nýjum leikmanni í dag

Jose Mourinho, stjóri Man Utd, reiknar ekki með að félagið aðhafist neitt í leikmannamálum á lokadegi félagaskiptagluggans en samkvæmt flestum fjölmiðlum ytra er félagið enn að eltast við nýjan miðvörð.

Mourinho ræddi við blaðamenn á blaðamannafundi fyrir leik Manchester United og Leicester í fyrstu umferð ensku úrvalsdeildarinnar og var að sjálfsögðu spurður að því hvort von væri á nýjum leikmanni á Old Trafford í dag.

„Ég er ekki sannfærður um það. Glugginn lokar í dag svo það er kominn tími, fyrir mig allavega, til að hætta að hugsa um leikmannamarkaðinn. Ég þarf að einbeita mér að leikmönnunum sem ég hef úr að velja í fyrstu leikjum mótsins,“ segir Mourinho.

Í kjölfarið þrýstu blaðamenn eftir skýrari svörum við því hvort félagið væri að reyna að bæta við sig leikmanni.

„Samkvæmt þeim upplýsingum sem ég hef þá er svarið nei,“ segir Mourinho.