Freyr: Vorum ekki með nógu margar réttar ákvarðanir á boltanum

Freyr Alexandersson, þjálfari íslenska kvennalandsliðsins í fótbolta, segir að Ísland hafi einfaldlega tapað fyrir betra liði er liðið tapaði 2-0 fyrir Þjóðverjum á heimavelli.

Ísland fékk á sig mark undir lok fyrri hálfleiks og Freyr tók undir með Tómasi Þór að tímapunkturinn hafi verið slæmur.

„Það var mjög vont. Það var aðeins farið að draga af okkur undir lok hálfleiksins. Við gerum bara mistök sem við vorum búin að tala um að gera ekki en svona er þetta bara,” sagði Freyr í settinu eftir leik.

„Það gekk mjög vel fyrstu 20-30 mínúturnar. Ég vissi að mestan hluta að leiknu yrðu þær með boltann og myndu ýta okkur niður. Ég er meira svekktur með síðara markið vegna þess að í 1-0 erum við enn með örlögin í okkar höndum.”

Með jafntefli hefði Ísland verið enn með örlögin í sínum höndum og var Freyr ekki sáttur með annað markið.

„Við þurfum bara að sækja eitt mark og þá erum við í góðum málum. Þegar 2-0 markið kemur þá er það vont. Við vissum þetta, við vorum búin að fara yfir þetta og erum með góða varnarmenn en samt ná þær þessu aftur, aftur og aftur.”

„Ef við ætlum að vera þarna uppi, sjáiði hvað þær eru að gera. Þetta er engin smá gæði.

„Það voru tækifæri og við vissum að tækifærin myndu koma. Þetta snérist um að hitta á daginn sinn og velja réttar ákvarðanir á boltanum. Við vorum ekki með nógu margar réttar ákvarðanir á boltanum,” sem segist vera stoltur.

„Við getum verið stolt af frammistöðunni, geggjuð stemning og þetta var flottur dagur. Við töpuðum fyrir betra liði og það er bara þannig."

Allt innslagið má sjá hér að ofan.