Magnaður Mané skaut Liverpool upp í 4. sætið | Sjáðu mörkin

Sadio Mané skoraði bæði mörk Liverpool í 2-0 sigri á Tottenham Hotspur í lokaleik dagsins í ensku úrvalsdeildinni.

Þetta var fyrsti deildarsigur Liverpool á árinu en með honum komst liðið upp í 4. sæti deildarinnar. Tottenham er áfram í 2. sætinu.

Liverpool var miklu sterkari aðilinn í fyrri hálfleik og hefði getað skorað mun fleiri mörk en þau tvö sem Mané gerði.

Senegalinn kom Rauða hernum á bragðið á 16. mínútu þegar hann slapp í gegn eftir sendingu Georginio Wijnaldum.

Rúmri mínútu síðar skoraði Mané aftur og kom Liverpool í 2-0. Markið kom eftir að Hugo Lloris, markvörður Tottenham, varði frá Adam Lallana og Roberto Firmino. Lloris sá þó ekki við Mané sem var frábær í leiknum.

Leikurinn jafnaðist í seinni hálfleik en sigur Liverpool var aldrei í hættu. Lokatölur 2-0, Liverpool í vil.