Magnaður Marcos Alonso fékk traustið hjá Conte

Marcos Alonso skoraði sitt fjórða mark á tímabilinu í sigrinum gegn Arsenal á laugardaginn. Spánverjinn öflugi hóf atvinnumannaferilinn hjá Real Madrid en var lítið í sviðsljósinu þar til Antonio Conte keypti hann frá Fiorentina í sumar. Alonso hefur slegið í gegn hjá Chelsea og verið lykilmaður í sigurgöngu liðsins á tímabilinu.

Umdeilt mark



Mark Alonso kom Chelsea á bragðið í toppslagnum gegn Arsenal. Hann var fyrstur að átta sig eftir að Diego Costa skallaði í þverslána og skallaði frákastið í netið fram hjá Petr Cech.

Margir vildu þó meina að markið hefði aldrei átt að standa þar sem Alonso fór með hendurnar á undan sér í skallaeinvígið gegn Hector Bellerin. Bellerin lá vankaður eftir og varð að fara af leikvelli. Á upptökum sást að Alonso fór með olnbogann í Bellerin og Arsene Wenger sagði eftir leik að um hefði verið að ræða 100% brot.

Markið stóð og lagði grunninn að 3-1 sigri Chelsea. Antonio Conte kom Alonso til varnar og sagði að það væri aldrei dæmt á álíka atvik á Englandi en viðurkenndi að mögulega hefði slíkt verið gert á Ítalíu.

Fékk ekki tækifærið hjá Real



Marcos Alonso kemur úr unglingastarfi Real Madrid en hann var á mála hjá spænska stórveldinu frá níu ára aldri. Hann lék tvö tímabil með varaliði félagsins og kom einu sinni við sögu hjá aðalliðinu þegar Manuel Pellegrini skipti honum inn á í uppbótartíma gegn Racing Santander árið 2010.

Nokkrum mánuðum seinna samdi Alonso við Bolton Wanderers sem þá lék í ensku úrvalsdeildinni og féll með liðinu í Championship-deildina í maí 2012. Hann lék áfram með Bolton árið eftir og var valinn leikmaður ársins af stuðningsmönnum tímabilið 2012-13.

Um sumarið samdi Alonso við Fiorentina en Spánverjinn knái var þó mættur á ný í enska boltann í janúar 2014, í þetta sinn á láni hjá Sunderland. Hann lék 16 leiki fyrir Sunderland, þar á meðal í úrslitaleik deildarbikarsins í tapi gegn Manchester City.

Eftir lánstímann hjá Sunderland vann Alonso sér sæti í liði Fiorentina og lék yfir 70 leiki með ítalska félaginu á síðustu tveimur tímabilum.

Smellpassar í kerfi Conte



Það kom nokkuð á óvart þegar Chelsea tilkynnti um kaupin á Marcos Alonso. Hann var keyptur á lokadegi félagaskiptagluggans á rúmar 20 milljónir punda og bjuggust flestir við að hlutverk hans yrði að vera varaskeifa fyrir Cesar Azpilicueta sem hafði leikið í vinstri bakverðinum fram að því.

Annað kom þó á daginn. Eftir dapurt gengi Chelsea framan af ákvað knattspyrnustjórinn Antonio Conte að breyta um leikkerfi. Hann setti Alonso inn sem vængbakvörð vinstra megin þar sem Spánverjinn fékk meiri ábyrgð sóknarlega en oft áður. Alonso er sterkur í loftinu auk þess að vinna ófáar tæklingar í vörninni og hefur spilað afar vel í kerfinu sem Conte notaði með góðum árangri hjá Juventus á sínum tíma.

Alonso hefur verið í byrjunarliðinu í síðustu 18 leikjum Chelsea í deildinni og er augljóst að Conte veðjaði á réttan hest þegar hann fékk Alonso til liðs við sig.

Erfið staða að spila



Alonso viðurkennir að það kosti mikla orku að leika þá stöðu sem hann gerir í Chelsea liðinu. Hann þurfi að hlaupa töluvert meira en áður því hann taki meiri þátt í sóknarleiknum en hann er vanur auk þess að sinna varnarvinnunni. Victor Moses leikur sömu stöðu hægra megin í kerfi Conte.

„Ég fer í sóknina um það bil átta sinnum í hverjum leik miðað við fjórum sinnum áður. Í þessari stöðu þarf ég að vera á fjærstönginni ef boltinn kemur frá kantinum hægra megin. Það er erfitt að halda sér ferskum en ég held að við hjálpum liðinu mikið, ég verð að halda mér í formi,“ sagði Alonso í viðtali fyrir skömmu.

Þeir Alonso og Moses hafa skorað 7 mörk samtals í deildinni og veitt eitraðri sóknarlínu liðsins mikilvægan stuðning. Það virðist lítið geta stoppað bláliða undir stjórn Conte sem fagnaði sigrinum gegn Arsenal líkt og titillinn væri í höfn.

Leikmaður helgarinnar



Romelu Lukaku gerði sér lítið fyrir og skoraði fjögur mörk í 6-3 sigri Everton gegn Bournemouth á laugardaginn. Everton situr í 7.sæti deildarinnar og hefur ekki tapað deildarleik frá því fyrir jól.

Það tók Lukaku ekki nema 30 sekúndur að opna markareikninginn á Goodison Park. Hann skoraði þá með skoti úr teignum eftir samspil við Ross Barkley og bætti svo við öðru marki sínu á 29. mínútu þegar hann kom Everton í 3-0. Belginn sterki fullkomnaði fernuna með tveimur mörkum á tveimur mínútum undir lokin en Bournemouth hafði þá náð að minnka muninn í eitt mark.

Með mörkunum fjórum er Lukaku nú markahæstur í deildinni með 16 mörk eftir 23 umferðir og hefur skorað marki meira en þeir Alexis Sanchez hjá Arsenal og Diego Costa hjá toppliði Chelsea.  

Þetta var í fyrsta sinn á ferlinum sem hinn 23 ára Lukaku skorar fjögur mörk í einum og sama leiknum en hann hefur tvisvar sinnum áður skorað þrennu í ensku úrvalsdeildinni, meðal annars í sigri Everton gegn Sunderland fyrr á tímabilinu.

Stóru málin eftir helgina í enska boltanum



Stærstu úrslitin

Sigur Hull gegn Liverpool var bæði óvæntur og mikilvægur. Liðið hefur tekið framförum undir stjórn Marco Silva og náð í fjögur stig í síðustu tveimur leikjum gegn Manchester United og Liverpool. Líkurnar á að liðið haldi sæti sínu í deildinni hafa aukist þó fram undan sé hörð fallbarátta.

Hvað kom á óvart?

Fyrir leikinn gegn Crystal Palace hafði Sunderland aðeins skorað fjögur mörk á útivelli á tímabilinu. Strákarnir hans David Moyes tvöfölduðu þann fjölda á laugardaginn og unnu óvæntan 4-0 sigur. Liðin eru jöfn í tveimur neðstu sætum deildarinnar og í harðri fallbaráttu.

Mestu vonbrigðin

Liverpool hefur ekki enn þá unnið deildarleik á þessu ári og knattspyrnustjórinn Jurgen Klopp sagði að frammistaðan í tapinu gegn Hull hefði verið óásættanleg. Endurkoma Sadio Mane í byrjunarliðið hafði lítið að segja og sóknarleikur liðsins, sem var frábær á fyrri hluta tímabilsins, er vart svipur hjá sjón.