Wenger búinn að skrifa undir nýjan samning

Arsene Wenger er búinn að skrifa undir nýjan samning hjá Arsenal og verður því áfram knattspyrnustjóri félagsins næstu tvö árin. David Ornstein, fréttamaður BBC, greinir frá þessu á Twitter.

Framtíð Wengers var óljós eftir að honum mistókst í fyrsta sinn á ferlinum að koma Arsenal í Meistaradeildina en liðið hafnaði í fimmta sæti ensku úrvalsdeildarinnar á síðustu leiktíð.

Margir stuðningsmenn Arsenal vilja sjá Frakkann yfirgefa félagið en hann hefur ekki orðið Englandsmeistari síðan 2004. Wenger hefur þó stýrt liðinu til þriggja bikarmeistaratitla á síðustu fjórum árum.

Wenger tók við Arsenal árið 1996 og vann ellefu af 16 titlum sínum með liðið á fyrstu tíu árunum en minna hefur verið um verðlaun síðan. Hann hefur stýrt Arsenal í 790 leikjum í ensku úrvalsdeildinni, 20 færri en Sir Alex Ferguson gerði hjá Manchester United á sínum tíma.

Franski knattspyrnustjórinn hitti Stan Kroenke, eiganda Arsenal, í gær þar sem gengið var frá þessum nýja samningi en Ornstein segir að þetta sé ekkert endilega síðasti samningurinn sem Wenger gerir við Arsenal.

Arsene Wenger today physically signed a new two-year contract (no break clause) to remain Arsenal manager until 2019, 23 years in total #AFC

— David Ornstein (@bbcsport_david) May 31, 2017