Gary Neville mætti stuðningsmönnum Arsenal | Sjáðu allt viðtalið

Gary Neville, fyrrverandi fyrirliði Manchester United sem nú er vinsælasti sparkspekingur Englands, mætti stuðningsmönnum Arsenal sem sjá um Arsenal Fan TV í löngu viðtali sem tekið var upp í höfuðstöðvum Sky Sports í dag.

Aðdragandinn er sá að Neville gagnrýndi stuðningsmann Arsenal eftir tapleik liðsins gegn Celsea en umræddur stuðningsmaður hélt á skilti í stúkunni þar sem hann var að mótmæla Arsene Wenger. Neville sneri sér svo næst að Arsenal Fan TV, sjónvarpsrás á YouTube þar sem stuðningsmenn eru teknir tali eftir leiki.

„Ég gekk út af vellinum og þar voru myndavélar frá Arsenal Fan TV út um allt. Það var vandræðalegt að hlusta á þetta og horfa á,“ sagði Neville.

Rásin er gríðarlega vinsæl og er með meira en 300 þúsund áskrifendur. Vinsælasta myndband rásarinnar hefur fengið meira en milljón spilanir.

Umsjónarmenn Arsenal Fan TV báðu Neville um að mæta í viðtal sem og hann gerði. Þar svaraði bakvörðurinn fyrrverandi fyrir orð sín um stuðningsmennina og svaraði svo spurningum þeirra um Arsenal-liðið.

Allt viðtalið má sjá í spilaranum hér að neðan.