Hönnuðir vagnanna segja að keppnin sé æsispennandi

Skátavagn og femínistavagn keppa nú um fyrsta sætið í hönnunarkeppni Strætó en í kvöld kemur í ljós hvor vagninn mun keyra um götur Reykjavíkur í haust. Hönnuðir vagnanna segja að keppnin sé æsispennandi.

Keppnin, sem hefur nú staðið yfir í nokkurn tíma, fer fram á meistaraverk.is en þar gefst fólki kostur á að hanna sinn eigin strætisvagn. Fjölmargar flottar en ótrúlega ólíkar tillögur eru á síðunni -til að mynda brauðvagn, Wintris-vagn og Skálmaldarvagn.  

Keppnin hefur vakið þó nokkra athygli á samfélagsmiðlum og keppist fólk við að deila myndum af þeim vagni sem það vill að keyri um götur bæjarins.

Síðustu daga hefur keppnin verið afar spennandi enda femínistavaginn KÞBAVD og skátavagninn hnífjafnir. Báðir eru komnir með yfir fimm þúsund atkvæði en úrslitin verða ljós um miðnætti í kvöld.

KÞBAVD er skammstöfun á frasanum „konur þurfa bara að vera duglegri“ sem er að sögn Lenu Margrétar Aradóttur, hönnuðar vagsins, kaldhæðin ádeila í jafnréttisumræðunni.

„Í fjölmiðlum og annars staðar er oft talað um að konur beri ábyrgð á því misrétti sem þær verði fyrir og að þær geti losað sig úr þeirri stöðu sem þær eru í með því að gera hitt og þetta,“ segir Lena Margrét.  Til dæmis þurfi þær að vera duglegri við að passa sig, við að biðja um launahækkun eða við að vera ekki dramatískar.

Lena útskýrir að skammstöfunin hafi orðið til í facebook-hópi sem fjölmargir femínistar eru meðlimir í. „En það eru margir sem vita ekki hvað þetta þýðir og það er einmitt það sem er skemmtilegt við þetta. Þetta skapar umræðu því fólk er forvitið. Það segir hvað er þessi óþjála skammstöfun? Sumum finnst mjög asnalegt að það standi á vagninum að konur þurfi að vera duglegri að gera hluti af því þau fatta ekki að þetta sé kaldhæðin ádeila og segja bíddu afhverju á ég að vera kjósa þennan vagn sem er niðrandi fyrir konur,“ segir Lena Margrét og hlær.

Jakob Guðnason, skáti,  er sá sem skráði skátavagninn Change til leiks.

„Okkar vagn kemur út af þessu skátamóti sem við erum að halda í enda mánaðar og þema þess er change eða breytingar og við erum að byggja á því að breytingar af hinu góða séu góðar eða skemmtilegar. Þannig að við erum eiginlega á sama meiði og feimínistavagninn. Við viljum breytingar,“ segir Jakob og bætir við að ef hann mætti ráða ráða myndu báðir vagnarnir keyra um götur bæjarins. Keppnin sé þó æsispennandi.