Engar áhyggjur þrátt fyrir 262 markalausar mínútur

Freyr Alexandersson, landsliðsþjálfari, kvaðst ánægður með spilamennsku íslenska liðsins í markalausa jafnteflinu gegn því spænska í gær.

„Þetta var mjög skemmtilegur leikur og hátt tempó. Við settum þær undir gríðarlega pressu og þær náðu litlum sem engum takti í sínum sóknarleik. En þær voru alltaf hættulegar þegar þær komust inn á síðasta þriðjunginn,“ sagði Freyr í samtali við Fréttablaðið í gær.

„Við náðum að taka þær að mestu út úr sínum leik. Svo var mjög gott að sjá að við náðum að laga þá hluti sem við ætluðum að laga inni í þessu kerfi eftir Japansleikinn. Við vildum gefa þessu einn leik í viðbót,“ sagði Freyr og vísaði þar til leikkerfisins 3-4-3 sem hann notaði bæði gegn Japan og Spáni.

Sara Björk Gunnarsdóttir skoraði um miðbik seinni hálfleiks í leiknum í gær en markið var dæmt af vegna rangstöðu, sem var líklega rangur dómur að mati Freys.

„Maður er ótrúlega sáttur með frábæra frammistöðu en ég hefði viljað vinna. Við skoruðum geggjað mark sem var líklega löglegt,“ sagði Freyr.

Hann segist ekki hafa áhyggjur af markaleysinu á Algarve-mótinu en Ísland hefur ekki skorað í 262 mínútur, eða frá því Gunnhildur Yrsa Jónsdóttir jafnaði metin í 1-1 á 8. mínútu gegn Noregi í fyrsta leik mótsins.

„Gegn Japan vorum við að spila við betra lið og náðum ekki að fóta okkur nægilega vel á löngum köflum. Það er ekkert sérstakt sem vantar, ég hef engar áhyggjur þótt við höfum bara skorað þarna snemma í fyrsta leik,“ sagði Freyr og bendir á að helstu markaskorarar íslenska liðsins séu ekki með eða hafi lítið spilað á Algarve-mótinu.

„Auðvelda skýringin er að Dagný [Brynjarsdóttir] og Margrét Lára [Viðarsdóttir] hafa lítið spilað og Harpa [Þorsteinsdóttir] og Hólmfríður [Magnúsdóttir] eru ekki með. Þetta svarar sér eiginlega sjálft. Þetta eru þeir leikmenn sem hafa skorað flest mörkin okkar síðasta eitt og hálfa árið,“ sagði Freyr Alexandersson að lokum.