Eintóm jafntefli hjá Íslendingaliðunum

Fjögur af fimm Íslendingaliðum í ensku B-deildinni gerðu jafntefli í kvöld.

Jón Daði Böðvarsson lék allan leikinn þegar Wolves gerði markalaust jafntefli við Ipswich Town á útivelli.

Úlfunum hefur gengið skelfilega að undanförnu og ekki unnið deildarleik síðan 31. janúar. Liðið er í 21. sæti deildarinnar með 36 stig, einu stigi og einu sæti frá fallsæti.

Bristol City, sem er í 22. sæti, gerði 1-1 jafntefli við Norwich City á heimavelli.

Hörður Björgvin Magnússon, sem spilaði vel í síðasta leik Bristol, sat allan tímann á varamannabekknum í leiknum í kvöld.

Ragnar Sigurðsson kom ekkert við sögu þegar Fulham og Leeds United skildu jöfn, 1-1, á Craven Cottage.

Aron Einar Gunnarsson lék ekki með Cardiff City í 1-1 jafntefli við Blackburn Rovers vegna veikinda.

Þá er Birkir Bjarnason meiddur og lék ekki með Aston Villa í 1-0 tapi fyrir Huddersfield.