Joe Gomez fær mikið hrós fyrir frammistöðuna á móti Neymar í gær

Liverpool-maðurinn Joe Gomez átti mjög góðan leik í gær þegar enska landsliðið gerði markalaust jafntefli við það brasilíska í vináttulandsleik á Wembley.

Nick Wright hjá Sky Sports fer meðal annars lofsamlegum orðum um frammistöðuna hjá þessum tvítuga varnarmanni í leiknum í gær og skrifar um það heila grein.  Það er óhætt að segja að stuðningsmenn Liverpool og enska landsliðsins fyllist bjartsýni eftir að þeir lesa hana.

Það vakti vissulega athygli þegar varnarmaður Liverpool vann sér sæti í enska landsliðinu fyrir leiki á móti stórliðum Þýskalands og Brasilíu enda hafa varnarleikur Liverpool ekki þótt merkilegur á tímabilinu.

Gareth Southgate, þjálfari enska landsliðsins, hefur hinsvegar trú á pilti og skellti honum síðan inn í byrjunarliðið á móti einu besta fótboltalandsliði heimsins.

Það er varla hægt að byrja á erfiða verkefni í sínum fyrsta byrjunarliðsleik með A-landsliðin en fá það verkefni að hafa gætur á leikmanni eins og Neymar hjá Brasilíu.

Neymar og félögum tókst hinsvegar ekki að komast í gegnum ensku vörnina þar sem Gomez var hægra megin við þá John Stones og Harry Maguire. Svo sannarlega framtíðarvörn enska landsliðsins þar á ferðinni.

Joe Gomez spilaði sinn fyrsta landsleik nokkrum dögum fyrr þegar hann kom inn fyrir Phil Jones sem meiddist. Hann stóð sig það vel í þeim leik að Southgate setti hann í byrjunarliði frekar en reynsluboltann Gary Cahill.

Gomez hafði aðeins spilað fjórtán leiki með Liverpool í ensku úrvalsdeildinni fyrir þetta landsliðsverkefni en það var ekki að sjá það á stráknum þegar hann lenti á móti einum besta knattspyrnumanni heims.

Undir lokin væri kannski líklegasti tíminn fyrir svo reynslulítinn mann að gera mistök en þá greip hann tvisvar inni í og bjargaði vel þegar Brasilíumenn voru að gera sig líklega til að skora sigurmarkið.

Fyrst tæklaði hann liðsfélaga sinn Roberto Firmino við mikinn fögnuð áhorfenda á Wembley og svo skömmu síðar komst hann fyrir stungubolta frá Neymar.

„Joe var valinn maður leiksins og réttilega svo,“ sagði Gareth Southgate eftir leikinn.

„Við þekkjum vel að hann hefur mikla íþróttahæfileika en í kvöld sáum við líka ákvörðunartökuna hans, yfirvegun hans á móti háklassa hreyfingum og hversu vel hann las sendingarnar þeirra,“ sagði Southgate.