Borgarlögmaður með rúmlega tvöföld mánaðarlaun borgarfulltrúa

Kjartan Magnússon, borgarráðsfulltrúi Sjálfstæðisflokksins, gagnrýndi meirihlutann í borginni harðlega fyrir óvönduð vinnubrögð vegna ráðningar borgarlögmanns í bókun sinni í borgarráði í gær. Hann furðar sig á því að aðeins tveir hafi sótt um embættið sem sé eitt hið mikilvægasta og best launaða innan borgarkerfisins. Staðan hafi aðeins verið auglýst einu sinni í einu dagblaði.

Samkvæmt upplýsingum sem Fréttablaðið fékk um launakjör borgarlögmanns frá Reykjavíkurborg nema heildarlaun hans 1.391.467 krónum á mánuði. Til samanburðar þá fá borgarfulltrúar nú 633 þúsund krónur á mánuði en borgarstjóri rúmar tvær milljónir króna, að meðtöldum greiðslum fyrir setu í stjórnum á vegum borgarinnar.

Greint var frá því í gær að Ebba Schram hæstaréttarlögmaður hefði verið ráðin í embættið eftir fund borgarráðs í gær. Kjartan var ómyrkur í máli í bókun sinni en annað sem vakti athygli var að forseti borgarstjórnar og fulltrúi VG í borgarráði, Líf Magneudóttir, sat hjá þegar atkvæði voru greidd um ráðninguna.

Aðspurð segir Líf að hún hafi viljað standa öðruvísi að málum.

„Hjáseta mín endurspeglar ekki óánægju mína með hvor umsækjandinn var valinn og varðar ekki persónu þeirra eða hæfni. Ég get þó sagt að ég hefði viljað standa öðruvísi að ráðningarferlinu sjálfu en fékk ekki nein tækifæri til að hafa áhrif á það. Ýmsu hefði mátt huga betur að þó ég beri fullt traust til þeirra starfsmanna sem komu að þessu og efist ekki um heilindi þeirra.“

Líf segir að hún hefði gjarnan viljað sjá fleiri umsækjendur en ráðningarferli æðstu yfirmanna borgarinnar sé eitthvað sem þurfi að skoða gagngert.

„Það var eitt og annað sem mér fannst ég ekki geta samþykkt svo ég ákvað að sitja hjá og gera ekki mál úr því.“