Viljum búa til góðar minningar á Íslandi

Það verður stór stund á Laugardalsvelli í dag þegar ensku úrvalsdeildarliðin Manchester City og West Ham munu eigast við. Þetta er síðasti æfingaleikur beggja liða fyrir upphaf nýs tímabils í ensku úrvalsdeildinni.

„Við erum fyrst og fremst ánægðir með að vera á Íslandi. Þetta er land sem maður fær ekki oft tækifæri til að heimsækja,“ sagði brosmildur Pep Guardiola við íþróttadeild á Laugardalsvelli í gær en bæði lið æfðu þar síðdegis í gær.

City hefur spilað frábærlega á undirbúningstímabilinu til þessa og eytt háum fjárhæðum í nýja leikmenn – einn þeirra er bakvörðurinn Kyle Walker sem er eins og flestir í liðunum að koma til Íslands í fyrsta sinn.

„Þetta er svolítið öðruvísi en á Englandi en við erum spenntir fyrir því að fá að spila hérna og fyrir okkar stuðningsmenn á Íslandi. Vonandi tekst okkur að búa til góðar minningar fyrir þá,“ sagði hann við Fréttablaðið í gær.

Fjárhagur liðanna afar ólíkur

„En það er alveg ljóst að þetta verður erfiður leikur gegn sterku liði úr ensku úrvalsdeildinni. Við höfum þó spilað gegn mörgum góðum liðum í sumar en fyrst og fremst viljum við fá fleiri mínútur og komast í betra form áður en nýtt tímabil hefst í ensku úrvalsdeildinni.“

Walker er einn þriggja bakvarða sem City hefur keypt í sumar fyrir meira en 120 milljónir punda samtals. Mark Noble, fyrirliði West Ham, notaði það sem dæmi um hversi mikill munur væri á fjárhögum liðanna.

„Dýrasti leikmaður í sögu West Ham kostaði 24 milljónir punda og það sýnir þennan mun ágætlega. En við erum með gott lið og munum leggja okkur alla fram,“ sagði Noble fyrir æfingu West Ham á Laugardalsvelli í gær.

Forréttindi að spila hér

Slaven Bilic lítur á leikinn í dag sem mikilvægan þátt í undirbúningi sínum fyrir nýtt tímabil.

„Þetta er stórleikur og það eru nokkrar ástæður fyrir því,“ sagði hann. „Þetta er síðasti leikur beggja liða fyrir upphaf nýs tímabils og svo er þetta í fyrsta sinn sem að tvö ensk úrvalsdeildarlið mætast á Íslandi. Það eru mikil forréttindi fyrir okkur að taka þátt í því. Þetta er því ekkert venjulegur æfingaleikur. Þetta er alvöru leikur sem mun sýna hvar við stöndum rétt áður en nýtt tímabil hefst.“

West Ham hefur verið öflugt á leikmannamarkaðnum, rétt eins og City, og fékk til að mynda Javier Hernandez frá Leverkusen, Pablo Zabaleta frá Manchester City og Marko Arnautovic frá Stoke.

„Það eru þó ekki allir í sínu besta leikformi, til að mynda Chicharito (Hernandez) sem kom til okkar fyrir einni viku síðan. Það eru einhver meiðsli frá síðasta tímabili og einhverjir munu missa af örfáum leikjum, en við erum ánægð með stöðu mála,“ sagði Bilic.

Einbeiti mér að fótboltanum

Walker segir að sér hafi verið vel tekið hjá City og að liðið spili knattspyrnu sem henti honum vel. Walker var keyptur frá Tottenham þar sem hann var á sínum tíma samherji Gylfa Þórs Sigurðssonar.

„Eftir að hafa verið hjá sama liðinu í níu ár hefur þetta verið öðruvísi sumar fyrir mig. En ég hef kynnst mörgum strákanna hjá City í gegnum landsliðið og það var auðvelt að komast inn í málin hér,“ sagði Walker sem óttast ekki að það sé pressa á honum eftir að hann var keyptur á 6,1 milljarð króna í sumar.

„Það er bara á milli félaganna og þeirra ákvörðun. Ég held mig bara við það að spila fótbolta og gera það sem gerði það að verkum að ég er orðinn leikmaður Manchester City. Vonandi tekst mér að sýna hversu mikils virði ég er.“