Lukaku opnaði markareikninginn í sigri á Real Salt Lake

Romelu Lukaku skoraði sitt fyrsta mark fyrir Manchester United þegar liðið vann 2-1 sigur á Real Salt Lake í æfingaleik í nótt.

Öll þrjú mörkin komu í fyrri hálfleik. Luis Silva kom bandaríska liðinu yfir á 20. mínútu en níu mínútum síðar jafnaði Henrikh Mkhitaryan metin. Armeninn skoraði einnig í 5-2 sigrinum á Los Angeles Galaxy aðfaranótt laugardags.

Á 38. mínútu var svo komið að Lukaku. Belginn skoraði þá sitt fyrsta mark fyrir United eftir sendingu frá Mkhitaryan.

José Mourinho, knattspyrnustjóri United, gerði 11 breytingar á liði sínu í hálfleik.

United lék manni færri síðasta hálftímann eftir að Antonio Valencia fékk að líta rauða spjaldið við litla hrifningu Mourinhos.

Þrátt fyrir liðsmuninn hélt United út og fagnaði sigri.