Rashford minnti á sig í öruggum sigri Manchester United

Ungstirnið Marcus Rashford minnti á sig með tveimur mörkum í fyrri hálfleik í öruggum 5-2 sigri Manchester United gegn LA Galaxy í borg englanna en þetta var fyrsti leikur Manchester United á undirbúningstímabilinu.

Nýjustu liðsmenn Manchester United, Romelu Lukaku og Victor Lindelof, byrjuðu leikinn á bekknum en fengu 45 mínútur í seinni hálfleik í fyrsta leik sínum fyrir félagið.

Það tók Rashford ekki langan tíma til að stimpla sig inn en hann kom gestunum yfir á annarri mínútu og bætti svo við öðru marki á tuttugustu mínútu leiksins.

Belgíski miðjumaðurinn Marouane Fellaini bætti við þriðja markinu sex mínútum síðar og var staðan 3-0 í hálfleik. Gerði Jose Mourinho ellefu breytingar á liði Manchester United í hálfleik.

Gestirnir frá Englandi bættu við tveimur mörkum frá Henrikh Mkhitaryan og Anthony Martial áður en fyrrum Börsungurinn Gio Dos Santos klóraði í bakkan í tvígang fyrir heimamenn.