„Hefði verið betra að kaupa Alves en Pennant og Crouch? Líklega já“

Rick Parry, fyrrum stjórnarformaður Liverpool, hefur greint frá því að Dani Alves hafi verið hársbreidd frá því að ganga í raðir Bítlaborgarliðsins sumarið 2006.

Liverpool var búið að ná samkomulagi við Alves en hætti svo við kaupin því félagið vildi ekki eyða háum fjárhæðum í bakvörð.

„Við vorum búnir að komast að samkomulagi við Alves eftir miklar flækjur en svo kom spurningin hvort við ættum að kaupa tvo leikmenn eða eyða öllu í bakvörð,“ sagði Parry.

„Alves var ekki leikmaðurinn sem hann er núna en það leit allt út fyrir að hann yrði frábær leikmaður. Hefði verið betra að kaupa hann en [Jermaine] Pennant og [Peter] Crouch? Líklega já, en það er auðvelt að vera vitur eftir á.“

Nú, 11 árum seinna, bendir flest til þess að Alves sé á leið í ensku úrvalsdeildina, til Manchester City þar sem hann hittir fyrir gamla stjórann sinn, Pep Guardiola.

Alves sló í gegn hjá Sevilla áður en Barcelona keypti Brasilíumanninn sumarið 2008. Alves vann 23 stóra titla með Barcelona áður en hann fór til Juventus síðasta sumar. Á sínu fyrsta og eina tímabili þar vann hann bæði deild og bikar.