Hörður Björgvin: Fékk fá svör frá þjálfaranum

Hörður Björgvin Magnússon, landsliðsmaður í fótbolta, fékk fá fá svör þegar hann gekk á þjálfara sinn hjá Bristol City eftir að vera settur í frystikistuna um mitt mót.

Íslensku landsliðsmennirnir sem spila í B-deildinni á Englandi eru búnir að vera í fríi frá því í lok apríl og hafa allir verið að æfa stíft hér á landi til að halda sér í formi fyrir stórleik Íslands á móti Króatíu í undankeppni HM 2018 sem fram fer á Laugardalsvellinum annan sunnudag. Einn þeirra er Hörður Björgvin Magnússon, leikmaður Bristol.

„Við fengum viku frí og reyndum að nýta það eins vel og við gátum til að hvíla okkur og undirbúa okkur vel fyrir heimkomu. Síðan þá höfum við æft eins og vitleysingar hér á Íslandi,“ segir hann.

Hörður Björgvin gekk í raðir Bristol City fyrir síðustu leiktíð og allt lék í lyndi fram að áramótum. Varnarmaðurinn ungi byrjaði 24 fyrstu leiki liðsins en eftir áramót byrjaði hann aðeins tvo og tók þátt í fjórum leikjum af næstu 22 hjá liðinu. Hvað gerðist þarna?

„Það koma líka erfiðir tímar þar sem maður situr á bekknum og svona en þjálfarinn ræður liðinu og maður þarf bara að vera tilbúinn þegar kallið kemur aftur,“ segir Hörður Björgvin sem fékk fá svör þegar hann leitaði eftir þeim.

„Ég er í svipuðum sporum og allir. Ég reyndi að fá einhverjar upplýsingar en fékk ekki eins miklar og ég vildi. Það komu nýir menn í janúarglugganum og þjálfarinn taldi þá betri en mig. Það gekk samt ekki vel þó að þeir kæmu inn.“

Vísir greindi frá því á dögunum að líklegt er að Hörður yfirgefi Bristol, hvort sem það er á láni eða fyrir fullt og allt, til að spila aftur reglulega. Áhuginn á honum er mikill.

„Maður veit aldrei hvernig þessi fótbolti er en auðvitað langar mig að spila alla leiki heilt tímabili. Ég var ánægður með tímabilið mitt í heild sinni en auðvitað langar mig að spila meira. Ég er opinn fyrir því ef eitthvað gerist en ég er samningsbundinn Bristol og er glaður og ánægður þar,“ segir Hörður Björgvin Magnússon.