Innlent

Á þriðja hundrað manns mætti á fyrsta fund Framfarafélagsins

Jóhann K. Jóhannsson skrifar
Á þriðja hundrað manns mætti á fyrsta fund Framfarafélagsins sem haldinn var í Rúgbrauðsgerðinni í dag. Formaður félagsins, Sigmundur Davíð Gunnlaugsson sagði félagið eiga að stuðla að framförum á öllum sviðum samfélagsins og að félagsmenn komi víða að úr samfélaginu.

Sigmundur Davíð Gunnlaugsson, þingmaður Framsóknarflokksins, fyrrum forsætisráðherra og nú formaður Framfarafélagsins sagði í ræðu sinni á fyrsta fundi félagsins í dag að stjórnmál væri að breytast í grundvallaratriðum. Tilgangur með stofnun félagsins væri að búa til vettvang fyrir frjóa umræðu fyrir hugmyndir og hvernig væri best að leysa hin ýmsu mál sem samfélagið standi frammi fyrir.  Með fundinum í dag er félagsstarfið formlega farið af stað.

„Nú nýtum við sumarið til þess að undirbúa öfluga innkomu í haust varðandi skipulag starfsins, söfnum fólki í félagið vonandi. Leitum hugmynda sem við svo kynnum í haust,“ segir Sigmundur Davíð Gunnlaugsson, formaður Framfarafélagsins og þingmaður Framsóknarflokksins.

Sigmundur segir að allir flokkar ekki bara Framsóknarflokkurinn eigi að geta nýtt sér það starf og þá vinnu sem félagið komi til með að skila af sér. Í ræðu sinni á fundinum í dag velti Sigmundur Davíð því fyrir sér hvernig samfélögum verði stjórnað í framtíðinni og spurningin er hvort hann sé orðinn afhuga lýðræðinu.

„Ég var einmitt að reyna að útskýra það að lýðræðið þyrfti að eiga endurkomu sem byggist á því að menn takist á, rökræði, haldi fram ólíkum skoðunum, bjóði upp á ólíkar lausnir,“ segir Sigmundur.

Sigmundur segir að samfélagið hafi verið að þróast úr lýðræði í kerfisræði þar sem stjórnmálaumræðan sé orðin einsleit og kerfinu eftirlátið að taka ákvarðanir og stjórna. Hann segir að félagið muni beita sér í komandi sveitar- og borgarstjórnarkosningum á næsta ári.

„Ég á allt eins von á því að að við munum já ræða ýmis mál sem að varða sveitarfélögin í aðdraganda sveitarstjórnarkosninga, skipulagsmál þar á meðal og vonandi muni það bara lyfta umræðunni,“ segir Sigmundur.

Á fundinum í dag var ekki að sjá mótherja Sigmundar úr Framsóknarflokknum og spurningin er hvort stofnun félagsins komi til með að auka enn meira á þann klofning sem er innan Framsóknarflokksins „Það er nú hellingur af Framsóknarmönnum hérna,“ segir Sigmundur.

Ekki mótherjunum?



„Ja, ég vona bara að allir Framsóknarmenn líti svo á að þetta sé eitthvað sem geti nýst flokknum,“ segir Sigmundur.  

 


Tengdar fréttir

Eygló: „Það er enginn einn sem getur verið stærri en flokkurinn“

Eygló Harðardóttir, þingmaður Framsóknarflokksins, segir það einfaldlega verða að koma í ljós hver sé raunverulegur tilgangur Sigmundar Davíðs Gunnlaugssonar með stofnun Framfarafélagsins sem sett var formlega á laggirnar í dag. Ljóst sé að enginn einn einstaklingur geti verið stærri en flokkurinn.

Segir félagið ekki nýjan stjórnmálaflokk

"Nei, ég er ekki að stofna nýjan flokk,“ segir Sigmundur Davíð Gunnlaugsson, þingmaður Framsóknarflokksins, aðspurður en hann boðaði í gær stofn­un nýs fé­lags, Fram­fara­fé­lags­ins.

Húsfyllir hjá Framfarafélaginu

Framfarafélagið er stofnað í kjölfar nýliðins miðstjórnarfundar Framsóknarflokksins en þar virðist lengi hafa ríkt nokkur ólga um framtíð Sigmundar innan flokksins.

Sigmundur Davíð stofnar nýtt félag

Sigmundur Davíð Gunnlaugsson, þingmaður Framsóknarflokksins og fyrrverandi forsætisráðherra, hefur tilkynnt um stofnun nýs félags, Framfarafélagsins, sem á að skapa öflugan vettvang fyrir frjálsa umræðu, fræðslu og framsetningu hugmynda og lausna.

Segist ekki vera að máta sig í borgarstjórastólinn

Stofnfundur Framfarafélagsins hófst nú klukkan ellefu í morgun en félaginu er ætlað að vera hugmyndasmiðja sem á að koma Framsóknarflokknum til aðstoðar. Sigmundur Davíð Gunnlaugsson er formaður Framfarafélagsins.




Fleiri fréttir

Sjá meira


×