Fótbolti

Minn tími mun koma

Eiríkur Stefán Ásgeirsson skrifar
Sverrir Ingi er þolinmóður og veit að hans tækifæri mun koma.
Sverrir Ingi er þolinmóður og veit að hans tækifæri mun koma. nordicphotos/getty

Varnarmaðurinn Sverrir Ingi Ingason hefur fengið sannkallaða eldskírn á fyrstu vikum sínum í spænsku 1. deildinni. Sverrir Ingi samdi við Granada í upphafi árs og hefur síðan þá spilað hverja einustu mínútu í hverjum leik. Granada stendur þó í harðri fallbaráttu og er sem stendur í næstneðsta sæti þegar tíu umferðir eru eftir af tímabilinu.

„Auðvitað er staðan erfið. Ég vissi þegar ég samdi að það yrði erfitt verkefni að halda liðinu uppi en það er enn nóg eftir og vonandi tekst okkur að vinna nokkra leiki á lokakaflanum og halda vonum okkar á lífi,“ sagði Sverrir Ingi við Fréttablaðið í gær.

Viðtalið var tekið rétt fyrir æfingu íslenska landsliðsins í Parma á Ítalíu um hádegisbil. Síðar um daginn flaug hópurinn yfir til Albaníu en þar fer fram leikur Kósóvó og Íslands í undankeppni HM 2018 á föstudagskvöld.

Besta lið heims í heimsókn
Sverrir Ingi segir að það hafi ekki komið honum á óvart að fá jafn mikið traust og hann hefur fengið frá þjálfara Granada. „Ég fékk þau skilaboð strax að ég myndi fara beint inn í liðið. Það hefur verið bras á liðinu og bæði þjálfarinn og forráðamenn félagsins vildu þetta.“

Granada fór ágætlega af stað á nýju ári en hefur gefið eftir. Nú síðast tapaði liðið fyrir Sporting Gijon, 3-1, í miklum fallslag en Sverrir Ingi skoraði sitt fyrsta mark í spænsku úrvalsdeildinni í umræddum leik. Eftir landsleikjahléið tekur við öllu stærra verkefni er Granada fær stjörnum prýtt lið Barcelona í heimsókn.

„Við gerum okkur auðvitað grein fyrir því hversu erfitt það verður. Að mínu mati eru þarna bestu leikmenn heims og besta lið heims. En við verðum að fara inn í leikinn með það hugarfar að við verðum að fá eitthvað út úr honum. Vonandi tekst okkur að stela sigri eða punkti, það myndi gera mikið fyrir okkur.“

Engin vonbrigði
Sverrir Ingi hefur nýtt þau tækifæri sem hann hefur fengið með landsliðinu vel og verið til að mynda duglegur að skora í æfingaleikjum. Hann gerir þó engar kröfur um sæti í byrjunarliðinu, þó svo að miðverðirnir Kári Árnason og Ragnar Sigurðsson hafi lítið spilað með sínum liðum að undanförnu.

„Ég hef margoft sagt að þeir sem hafa verið í íslensku vörninni hafa verið frábærir. Ég er 23 ára miðvörður og veit að minn tími mun koma. Ég verð líka klár ef kallið kemur en það verða alls engin vonbrigði ef það kemur ekki.“

Hann segist hafa lært mikið af því að spila með reynsluboltunum í íslensku vörninni.

„Þeir þekkja þennan alþjóðabolta vel eftir að hafa spilað í fremstu röð í mörg ár. Þeir hafa hjálpað mér mikið.“


Tengdar fréttir

Ef ég væri Heimir myndi ég setja mig í liðið

Emil Hallfreðsson er lykilmaður í Udinese á Ítalíu, liði sem spilar í einni sterkustu deild heims. Hann segist hafa persónulega orðið fyrir vonbrigðum á EM en hann bíður rólegur eftir tækifæri sínu með landsliðinu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.