Gylfi Þór Sigurðsson er ekkert að velta fyrir sér framtíðinni hjá Swansea þrátt fyrir daglegar fréttir í Englandi um möguleg vistaskipti og segist algjörlega helgaður því að bjarga félagi sínu frá falli úr ensku úrvalsdeildini.

Enskir miðlar segja að það þurfi 35 milljónir punda, um fimm milljarða íslenskra króna, til að fá Swansea til að selja sinn besta leikmann. En Gylfi er þó sjálfur lítið að velta þessu fyrir sér og einbeitir sér þess í stað að stað og stund í Swansea.

„Maður venst þessu eftir að hafa verið orðaður við nokkur lið í gegnum tíðina. Ég er einbeittur að því að reyna að halda liðinu uppi og vinna leiki. Þa er lítið eftir af tímabilinu og þetta mun örugglega ráðast á nokkrum stigum. Það svo sem gerist í framtíðinni verður bara að koma í ljós.“

Paul Clement tók við Swansea snemma á árinu og eftir það gerbreyttist gengi liðsins til hins betra. Gylfi segist afar ánægður að spila fyrir Clement og segir að hann hafi fært liðinu meiri stöðugleika.

„Með fyrri stjóranum voru margar breytingar í hverjum leik - 4-5 í byrjunarliðinu á milli leikja. Það hafði áhrif á hvar ég spilaði, stundum var ég frammi, svo á miðjunni og svo á kantinum. En það er kominn meiri stöðugleiki í liðið núna og við spilum alltaf eftir sama skipulaginu og í sömu stöðum.“

„Leikmenn vita miklu betur til hvers er ætlast af þeim og hvernig við eigum að spila. Fyrir vikið er liðið með mun meira sjálfstraust nú en fyrir nokkrum mánuðum síðan.“

Gylfi er stoðsendingahæsti leikmaðurinn í fimm sterkustu deildum Evrópu með alls ellefu stoðsendingar. Þar stendur hann framar en margir bestu leikmenn heims og það er hann vitanlega ánægður með.

„Það er auðvitað frábært en tímabilið er ekki búið og ég vil enda eins ofarlega og hægt er. Þannig að ég verð líklega að leggja upp nokkur mörk til viðbótar til að ná því.“

Aðspurður um hvort hann myndi senda hann eða skora sjálfur, ef hann væri sloppinn í gegn og með samherja sér við hlið, var svarið einfalt. „Ætli ég myndi ekki renna honum til hliðar,“ sagði hann í léttum dúr.

Alla fréttina úr kvöldfréttum Stöðvar 2 má sjá í spilaranum hér að ofan.