Conte ekki á förum frá Chelsea

Antonio Conte, stjóri Chelsea, hefur skotið niður allar sögusagnir um að hann sé á leiðinni til Inter í sumar.

Sagt var að hann ætti erfitt með að aðlagast lífinu á Englandi og saknaði fjölskyldu sinnar sem er enn á Ítalíu. Því ætlaði hann sér til Inter.

„Þetta hefur verið frábær reynsla. Auðvitað hef ég saknað eiginkonunnar og dótturinnar en vonandi koma þau hingað fljótlega því ég þarf á þeim að halda,“ sagði Conte.

„Vonandi verð ég stjóri hér í mörg ár. Er maður byrjar með ný verkefni vill maður helst vera sem lengst og halda áfram að byggja.“

Conte er á sínu fyrsta ári með Chelsea og fátt virðist geta komið í veg fyrir að hann geri lið Chelsea að Englandsmeisturum.