Liverpool með mikilvægan sigur í Meistaradeildarbaráttunni | Sjáðu mörkin

Liverpool lyfti sér upp í 3. sæti ensku úrvalsdeildarinnar með 3-1 sigri á Arsenal í stórleik dagsins.

Liverpool var miklu sterkari aðilinn í fyrri hálfleik og var 2-0 yfir að honum loknum.

Roberto Firmino kom Liverpool yfir þegar hann skoraði með skoti af stuttu færi eftir sendingu Sadios Mané. Fimm mínútum fyrir hálfleik endurgalt Firmino svo greiðann og lagði upp mark fyrir Mané.

Alexis Sánchez kom inn á í hálfleik og á 57. mínútu fann Sílemaðurinn Danny Welbeck sem lyfti boltanum laglega yfir Simon Mignolet í marki Liverpool.

Þrátt fyrir að hafa nægan tíma kom jöfnunarmark Arsenal aldrei. Liverpool átti hins vegar síðasta orðið þegar Georginio Wijnaldum skoraði eftir vel útfærða skyndisókn og sendingu Divocks Origi. Lokatölur 3-1, Liverpool í vil.

Lærisveinar Jürgens Klopp eru sem áður sagði í 3. sæti deildarinnar en Manchester City getur endurheimt það fái liðið stig gegn Sunderland á morgun.

Arsenal er í 5. sætinu með 50 stig, tveimur stigum á eftir Liverpool og City.