Varamaðurinn Ayew bjargaði stigi fyrir West Ham | Sjáðu mörkin

Varamaðurinn Andre Ayew bjargaði stigi fyrir West Ham í jafntefli gegn Watford í lokaleik dagsins í enska boltanum á Vicerage Road en heimamenn voru óheppnir að taka ekki öll stigin þrjú.

Troy Deeney kom Watford yfir af vítapunktinum á upphafsmínútum leiksins en Watford varð fyrir áfalli undir lok venjulegs leiktíma þegar fyrrum leikmaður West Ham, Mauro Zarate, var borinn af velli á börum.

Tók það sjúkrateymi Watford tíu mínútur að koma honum inn í búningsklefa en honum var gefið súrefni er hann var borinn af velli.

Ayew var aðeins búinn að vera inná í nokkrar mínútur þegar hann jafnaði metin af stuttu færi. Var hann mættur og komst fyrstur í boltann eftir að skot Michail Antonio hafnaði í stönginni.

Antonio fékk sitt annað gula spjald og því rautt tíu mínútum fyrir leikslok og sóttu leikmenn Watford stíft á lokametrunum en náðu ekki að bæta við marki.

West Ham komst upp fyrir Stoke í 9. sæti deldarinnar með stiginu en Watford er í 12. sæti með 31 stig að 26 umferðum loknum.