Leicester City skreið áfram í bikarnum

Englandsmeistarar Leicester City eru komnir í sextán liða úrslit ensku bikarkeppninnar eftir 3-1 sigur á Derby County. Framlengja varð leikinn.

Þetta var endurtekinn leikur hjá liðunum þar sem fyrri leikurinn á milli liðanna fór 2-2.

Markalaust var eftir 45 mínútur eftir hrútleiðinlegan fyrri hálfleik. Það breyttist strax á fyrstu mínútu síðari hálfleiks er Andy King kom Leicester yfir.

Neðrideildarliðið gafst ekki upp við það og Abdoul Camara jafnaði metin fyrir Hrútana er hálftími var eftir af leiknum. Ekki var meira skorað í venjulegum leiktíma og því varð að framlengja.

Á fjórðu mínútu framlengingarinnar náði Onyinye Ndidi að koma Leicester í 2-1. Það var svo Demarai Gray sem kláraði dæmið er hann skoraði þriðja markið eftir glæsilegt einstaklingsframtak.