Martial í stuði í öruggum sigri Man. Utd | Sjáðu mörkin

Manchester United skaust upp í 5. sæti ensku úrvalsdeildarinnar með öruggum 2-0 sigri á Watford á Old Trafford í dag.

United er nú komið með 48 stig, tveimur stigum meira en Liverpool sem sendir Rauðu djöflana aftur niður í 6. sætið með sigri á Tottenham Hotspur á eftir.

United var mun sterkari aðilinn í leiknum. Juan Mata kom heimamönnum yfir á 32. mínútu með skoti af stuttu færi eftir sendingu frá Anthony Martial.

Frakkinn var besti maður vallarins og hann bætti öðru marki við á 60. mínútu eftir skyndisókn.

Fleiri urðu mörkin ekki og öruggur sigur United staðreynd.